Bas múftı Naýryzbaı qajy Taǵanuly dinı termınderdi qazaqsha aıtýǵa shaqyrdy. Bul týraly ol elordada ótken baspasóz máslıhatynda aıtty, dep habarlaıdy “Adyrna” ulttyq portaly.
«Osy rette jastardy dinı termınderdi qazaqsha aıtýǵa shaqyramyn. Ókinishke qaraı, keıbir jas býyn ókilderiniń aýyzashardy - ıftar, sáresin - sýhýr dep aıtyp júrgeni kóńilge qaıaý túsiredi. San ǵasyrdan beri musylmandyq joldy ustanǵan ata-babalarymyz aýyzashar, sáresi degen sózderdi qoldanǵan. Biz de babalar jolyn ustanǵan urpaq retinde ózge tilden engen dinı termınderden barynsha aýlaq bolyp, ózimizdiń ata-babamyzdan qalǵan jaqsy sózderdi qoldanyp, ózimizdiń ana tilimizge qurmet kórsetip, qazaqsha sóıleýge tyrysaıyq»,- dedi Naýryzbaı qajy Taǵanuly.
Aıta keteıik, Qazaqstan musylmandary dinı basqarmasy ortaq pátýaǵa sáıkes, qasıetti Ramazan aıy 1 naýryzda bastalatynyn habarlap otyr. Naýryz aıynyń 26-nan 27-ne qaraǵan tún — Qadir túni, al 30 naýryz — Oraza aıt merekesi.
Elimizdiń Bas múftıi Naýryzbaı qajy Taǵanulynyń tóraǵalyǵymen ótken Qazaqstan musylmandary dinı basqarmasynyń tóralqa májilisinde pitir sadaqasy elimiz boıynsha eki keli unnyń ortasha baǵasy negizinde 655 teńge bolyp bekitildi.
