Bügın Bas müfti Nauryzbai qajy Taǧanūly qūttyqtau barysynda qazaqstandyqtarǧa jyly lebızın bıldırıp, el tynyştyǧyn tılek ettı, dep habarlaidy "Adyrna" tılşısı.
Qazaqstan mūsylmandary dıni basqarmasynyŋ töraǧasy, Bas mufti Nauryzbai qajy Taǧanūly halyqty oraza aitymen qūttyqtady.
Nauryzbai qajy öz qūttyqtauynda eldegı ahualǧa qatysty söz qozǧady.«Sızderdı isı mūsylmannyŋ ūlyq meiramy – oraza aittyŋ keluımen şyn jürekten qūttyqtaimyn! Ait qabyl bolsyn! Qasiettı Ramazannyŋ aiaqtalǧanyn bıldıretın meiramda, jürekke meiırım, quanyş sezımı ūialaityn säulelı sätte sızderge, otbasylaryŋyzǧa riiasyz nietpen Allanyŋ amandyǧy men berekesın tıleimın. Jaratqan jar bolsyn! Alla Taǧala otyz kün boiy ūstaǧan orazamyzdy, jasaǧan dūǧamyzdy, oryndy sebeptermen auyz bekıte almai qalǧan jandardyŋ qaiyrly amaldaryn qabyl etkei!», - dedı bas mufti.«Ait» sözı – merekeleu, hal sūrasu, bır-bırın quantu, quanyşqa toptalu, qarymta degen maǧynany bıldıredı.«Jaratuşy Jabbar İemız: «...Olar Men üşin oraza ūstady, Meniŋ pärmenimmen auyz aşty, endi quanyşqa kenelsin...», - dep süiınşı habar jetkızgen. Jaratuşy İemız barşa mūsylman qauymnyŋ quanyşyn arttyrǧai! Qazaqstan mūsylmandary dıni basqarmasy qasiettı Ramazan aiynda elımız boiynşa qaiyrymdylyq jobalardy jüzege asyrdy. Sauaptar eselenıp jazylatyn berekelı aida igı ıske atsalysqan erıktılerge, demeuşı azamattar men jomart jandarǧa riiasyz nietpen airyqşa alǧysymdy bıldıremın. Alla razy bolsyn!», - dedı ol.
«Özderıŋızge belgılı, elımızdıŋ bırneşe aimaǧynda bolyp jatqan köktemgı su tasqyny jergılıktı aǧaiyn-jūrtty üreilendırıp, ülken äbıgerge saluda. Üiı men mal-düniesınen aiyrylǧan otbasylarǧa memleketımız tiıstı kömek körsetude. Qazaqstan mūsylmandary dıni basqarmasy da öz mümkındıgı aiasynda su tasqynynan zardap şekken azamattardy meşıt pen medreselerge ornalastyryp, olarǧa moraldyq tūrǧydan qoldau körsettı. Sonymen qatar su basqan aimaqtarǧa 100 tonnadan astam gumanitarlyq kömek jıberdı. Tasqyn sudan üiı jaramsyz bolyp qalǧan qolynda mügedektıgı bar ekı balasymen şarasyz küige tüsken jalǧyz basty anaǧa päter berdı. 1113 dın qyzmetkerı ortaq ıske jūmyldyryldy. Osy rette barşa mūsylman qauymyn Oraza ait künderı synaqty künderdı bastan keşıp jatqan jūrtymyzǧa qol ūşyn berıp, jürekterıne quanyş ūialatuǧa şaqyramyn. «Qaiyrymdylyq jasasaŋ – qaiyryn özıŋ köresıŋ» dep halqymyz aitqandai, ızgı ıstıŋ sauaby eselenıp, qaiyryn özderıŋız körıŋızder. Oraza ait merekesı qūtty bolsyn! Rabbymyz dūǧa-tılegımızdı, qasiettı aida jasaǧan qaiyrly ısterımızdı, bergen zeket pen pıtır sadaqamyzdy qabyl etkei! Är otbasyna amandyq, jaqsylyq, qūt-bereke tıleimın. Orazadan orazaǧa deiın aman-esen jete bereiık! Alla Taǧala qazaq dalasyn türlı tabiǧi apattardan saqtaǧai. Synaqty sätterdı bastan keşıp jatqan jerlesterımızge Jaratqan İemız jar bolǧai. Elımız aman, jūrtymyz tynyş bolǧai! Ämin!», - dedı Nauryzbai qajy Taǧanūly.
Ūqsas jaŋalyqtar
