Shahmattan eks-álem chempıony Magnýs Karlsen tanymal podkaster Djo Roganǵa bergen suhbatynda Almatyda ótken shahmat chempıonaty týraly pikirin bólisti. Ol shahardaǵy ekologııalyq jaǵdaıǵa kóńili tolmaǵanyn málimdedi, dep habarlaıdy «Adyrna» tilshisi.
«Shahmattan álem chempıonattary kóbine erekshe jerlerde ótedi. Bul chempıonat Almatyda ótti. Al bul óńir, kem degende qysta, óte lastanǵan jáne asa jaıly emes. Almatynyń tómengi bóliginde, qala ishinde bolý múldem múmkin emes», — dedi norvegııalyq grossmeıster.
Dese de, sportshy qaladan bir saǵattyq jerde kóz tartarlyq taýlar bar ekenin, onda tamasha ýaqyt ótkizýge bolatynyn atap ótti. Ol qonaqjaılylyq úshin alǵysyn bildirip, Qazaqstannyń tabıǵaty erekshe áser etkenin jetkizdi.
«Qaladan bir saǵattyq jerde sizderde Alpige uqsas keremet taýlar bar. Olar 3,5 myń metr bıiktikke deıin kóterilip, tańǵajaıyp kórinis syılaıdy. Taý basyna shyǵyp, keremet shańǵy demalysyn ótkizýge bolady», – dedi Karlsen.
Eske salaıyq, norvegııalyq grossmeıster Magnýs Karlsen Almatyda jedel shahmat boıynsha (rapıd) ótken 2022 jylǵy álem chempıonatyn jeńip alǵan edi.
