Shyǵystaǵy qos oblys ákiminiń bir mezgilde aýysýy qoǵam nazaryn aýdardy. Ketkenderden góri kelgenderdiń áleýeti rezonans týdyrǵandaı. Degenmen sarapshylar ne deıdi?
Búgin Shyǵys Qazaqstan oblysynyń ákimi bolyp buǵan deıin oblys ákiminiń birinshi orynbasary retinde qyzmet atqarǵan Nurymbet Saqtaǵanov taǵaıyndaldy. Biraq jurttyń nazary atalǵan taǵaıyndaýdan góri Abaı oblysyna ákim bolyp taǵaıyndalǵan Berik Ýálıge aýdy. Belgili telejýrnalıst buǵan deıin prezıdentiniń keńesshisi – prezıdenttiń paspasóz hatshysy retinde qyzmet atqarǵan. Onyń kandıdatýrasyna máslıhattyń 102 depýtat daýys berse, 24 depýtat ekinshi kandıdat Kýrchatov qalasynyń ákimi Bolat Ábdirálıevke daýys bergeni aıtylýda.
«BOS JATQAN JER JAÝ ShAQYRADY» JÁNE SAQTAǴANOVTYŃ SIPATY
Májilis depýtaty Ermurat Bapı Shyǵys Qazaqstan oblysy ákimi Nurymbet Saqtaǵanovtyń tájirıbeli azamat ekenin aıtady. Sondaı-aq ol qos taǵaıyndaýǵa da alabóten qaramaıtynyn eskertti.
«Ejelgi grekterde «Qysh qumyrany qudaılar kúıdirip jasamaıdy. Ony adamdar jasaıdy» degen támsil bar. Osy kózqaraspen qarasam, eki taǵaıyndaýǵa da alabóten qaramaımyn. Qalypty dástúrdegi taǵaıyndaýlar. Ádette ákim qyzmetten joǵarylaıtyn kezde «Ornyńyzǵa kimdi usynasyz?» dep suraıdy. Ermek Kósherbaevtyń ornyna kelgen óziniń birinshi orynbasary Nurymbet Saqtaǵanov degen azamat óte tájirıbeli maman. Berdibek Saparbaevtyń shákirti retinde oblys ákiminiń orynbasary men aýdan ákimi qyzmetin atqarǵan azamat. Bir sózben aıtqanda memlekettik basqarý apparatynan ótken ári Shyǵys Qazaqstan oblysynyń qyr-syryn sońǵy 10 jyldyń kóleminde biletin azamat retinde taǵaıyndaǵan shyǵar dep oılaımyn. Shynymdy aıtsam eshqandaı alabóten aıtatyndaı teris kózqarasym joq», - deıdi depýtat jýrnalıst.
Aıtýynsha, jańadan taǵaıyndalǵan ákim endi shekaralyq aýdandarǵa kóńil bólý kerek. Óıtkeni prezıdenttiń jarlyǵymen jańa aýdandar qurylǵanymen ol aýdandarǵa jasalyp jatqan kómek joq.
«Halyq údere kóshken Marqakól aýdanynda 9 myńǵa jeter-jetpes halyq qaldy. Jańa ákim shekaralyq aýdandardy kórkeıtip, onda halyq turaqtaýyna baılanysty jumys isteýi kerek. Sebebi «Bos jatqan jer jaý shaqyrady» degen támsil bar. Saqtaǵanov sý jańa ákim retinde osy baǵytta júıeli jumys jasaıdy degen úmitim bar», - deıdi Ermurat Bapı.
Ol Shyǵys Qazaqstan oblysynyń taý-ken metallýrgııa salasynyń oshaǵy ekenine de nazar aýdarǵan.
«Atalǵan aımaqtaǵy taý-ken metallýrgııa ónerkásibiniń paıdasy memleket pen halyqqa qandaı paıda berip jatyr? Óńirdegi zaýyttar men ónerkásip kimniń qolynda ketti degen dúnıege revızııa jasap, sonyń esebin beretin ýaqyt boldy. Qazirgi bıýdjet tapshylyǵy kezinde óńirdegi taý-ken metallýrgııa ónerkásibiniń halyqqa paıdasy bolýy kerek. Osy jáne ózge de isterge Saqtaǵanov jete nazar aýdarýy kerek», - deıdi depýtat Ermurat Bapı.
«KREATIVTI ShEShIM» JÁNE BERIK ÝÁLIGE NE JETPEIDI?
Májilis depýtaty Abaı oblysy Berik Ýálıdi taǵaıyndaý Qasym-Jomart Toqaevtyń kreatıvti taǵaıyndaýy boldy dep esepteıdi.
«Meniń bilýimshe, bul – ákim bolyp taǵaıyndalǵan úshinshi jýrnalıst. Birinshi ákim Muhtar Qul-Muhammed bolsa, ekinshisi Beıbit Isabaev jáne úshinshi jýrnalıst retinde Berik Ýálı taǵaıyndalyp tur. Bıznes qaýymdastyqpen eshqandaı baılanysy joq, kerisinshe ulttyq jáne týǵan jerge patrıottyq múddeden basqa bul azamatta basqa múdde bolmaıdy dep oılaımyn. Prezıdentpen sońǵy 3-4 jyldan beri qatar júrgendikten memleket basshysy Abaı oblysyna tól túlegin taǵaıyndaǵan sııaqty», - degen depýtat Berik Ýálıdiń kemshiligin de atap ótken.
«Kezinde jetim qyzdaı ógeı bolyp qalǵan Semeı óńirin túletýge osyndaı ulttyq múddege jumys isteıtin parasatty azamat laıyq dep tapsa kerek. Árıne, Berik Ýálıdiń memlekettik jáne óndiristik basqarý tájirıbesi kemshin. Biraq ol ár sala boıynsha myqty-myqty orynbasarlar tańdap alatyn bolsa, al ózi jergilikti jerdiń jaǵdaıyna baılanysty uıymdastyra bilse boldy. Berik Ýálı «Týǵan jerge týyńdy tik» degendeı Abaı oblysynyń tól perzenti. Oǵan endi azamattyq qana mindet emes, perzenttik mindet júktelip otyr. Boıynda qýaty bar, kúsh-jigeri bar, óziniń týǵan ólkesin damytýǵa barlyq kúsh-jigerimen kirisedi degen senimdemin»,- dedi ol.
Áleýmettik jelide «Berik Ýálı Abaı Qunanbaıulynyń 180 jyldyǵyn atap ótý úshin taǵaıyndaldy» dep jazyp jatqan azamattar bar. Áıtse de Ermurat Bapı jurttyń bul pikirimen kelispeıdi.
«Bul endi qoǵamdyq ortadaǵy konspırologııalyq pikir ǵoı. Jeke óz basym Berik Ýálıdi Abaıdyń 180 jyldyǵyna baılanysty taǵaıyndady dep oılamaımyn. Bul endi óte usaq pikir bolady. Tutas óńirdiń basqarý máselesin bir mereıtoımen baılanystyryp qoıýǵa bolmaıdy dep oılaımyn. Árıne, Abaı mereıtoıyn ótkizý qazaq úshin ǵana emes, álemdik rýhanııatqa qajetti másele. Sebebi Abaı álemdik tulǵa ǵoı. Mereıtoı ótedi de, ketedi. Oblysty basqaryp, ony odan ári jetildirý máselesi kúndelikti qajyr-qaıratty qajet etedi», - deıdi Ermurat Bapı.
«MÁSELE ADAMYNDA EMES»
Májilis depýtatynyń pikirimen saıasattanýshy Qazybek Beısebaev múlde kelispeıdi. Sarapshy ákimdi prezıdent ákimshiligi emes, jergilikti máslıhat ózi prezıdentke usynyp, taǵaıyndalýy kerek ekenin eskertti.
«Shyǵys Qazaqstan oblysyn basqarǵan Ermek Kósherbaev – 1,5 jyl, al Abaı oblysyn Nurlan Uranhaev 3,5 jyl basqardy. Atalǵan azamattar óńirdi jaqsy basqardy ma, joq álde nashar basqardy ma, ol týraly naqty aqparatty bilmeımiz. Biraq oblys basqarǵan adam 3 jylda mardymdy sharýa isteı ala ma? Qandaıda bir joba nemese zaýyt salyp úlgere me? Qysqa merzimde aýqymdy jumysty istep úlgermeıdi ǵoı. Ákimder taǵaıyndalady da, arada 2 jyl ótpeı aýystyryp tastaıdy. Az ǵana ýaqyttyń ishinde qalaı keshendi jumystardy isteýge bolady?» - deıdi Qazybek Beısebaev.
Ol ákimderdi taǵaıyndaýǵa eskerý kerek jaıt retinde mynany aıtty.
«Bizde Konstıtýııa boıynsha oblys ákimderin prezıdent taǵaıyndaıdy. Astanadaǵy Prezıdent ákimshiliginde otyrǵan adam ózi bilmeıtin óńirdegi eki úmitkerdi qalaı usynady? Eger Abaı men Shyǵys Qazaqstan oblysynyń máslıhaty eki úmitkerdi ózderi tańdap, prezıdentke usynsa áńgime basqasha bolar edi. Bul adamdar oblys ákimi bolyp qansha ýaqyt otyrady? Shamaly ýaqyt ótkennen keıin joǵary jaqtan eshteńe túsindirmesten alyp tastaı salady. Shynyn aıtqanda halyqtyń oblys ákiminiń taǵaıyndaýǵa eshqandaı yqpaly joq. Bul múlde durys emes», - deıdi saıasattanýshy.
Ol ákimder isine syn bolǵan jaıdy da atap ótti.
«Mysaly, byltyr eki oblystyń saǵat beldeýi ózgerdi. Sonda 2 oblystyń ákimi da halyqqa yńǵaısyz saǵat beldeýine baılanysty bir sóz aıtpaı, úndemeı otyrdy. Saǵat beldeýin aýystyrý Shyǵys Qazaqstan oblysynyń halqyna qatty kedergi keltirdi. Biraq Ermek Kósherbaev pen Nurlan Uranhaev bir de bir pikir bildirgen joq», - deıdi Qazybek Beısebaev.
Ol oblys ákimderin burynnan jalǵasyp kele jatqan qazirgideı taǵaıyndaý júıesi múlde durys emes degen senimde.
«Berik Ýálı bola ma, joq álde Nurymbet Saqtaǵanov bola ma, másele adamda emes. Bizdiń eldegi oblys ákimderin taǵaıyndaý júıesi durys emes. Sebebi halyqtyń talap-tilegimen sanaspaıdy. Biz bılik Abaı men Shyǵys Qazaqstan oblystarynyń ákimderin qandaı krıterıı boıynsha tańdaǵanyn bilmeımiz»,- deıdi saıasattanýshy.
