Qytaıdyń Chýnın qalasynan Aýǵanstannyń Haıraton qalasyna alǵashqy tikeleı júk poıyzy jolǵa shyqty, dep habarlaıdy “Adyrna” ulttyq portaly.
Sınhýa agenttiginiń habarlaýynsha, 10 aqpan kúni tańerteń Ońtústik-Batys Qytaıdaǵy megapolısti Aýǵanstanmen baılanystyratyn birinshi temirjol baǵyty ashylǵan.
Poıyzda 55 konteıner júk tıelgen. Olardyń ishinde Qytaıdyń ZTE telekommýnıkaııalyq kompanııasy óndirgen baılanys jabdyqtary bar. Júk Qorǵas shekaralyq beketi arqyly Qazaqstan men Ózbekstan aýmaǵyn basyp ótip, 12-15 kún ishinde Haıratonǵa jetedi.
Qytaılyq kompanııa ókilderiniń aıtýynsha, tikeleı temirjol tasymaly júk jetkizý ýaqytyn 3-5 táýlikke qysqartady, al logıstıkalyq shyǵyndar 15-20%-ǵa tómendeıdi.
Chýnın bıliginiń málimetinshe, bul qala Qytaı men Eýropa, sondaı-aq Qytaı men Ortalyq Azııa arasyndaǵy 18 myńnan astam halyqaralyq júk poıyzyn jóneltken.
Júk poıyzy Qazaqstan men Ózbekstan aýmaǵy arqyly ótedi.
