Memleket basshysy Qasym-Jomart Toqaev otandyq bıznes ókilderimen kezdesýde Úkimetke qosymsha qun salyǵy máselesin taǵy da pysyqtaýdy tapsyrdy. Bul týraly Aqorda jarııalady, dep habarlaıdy “Adyrna” ulttyq portaly.
Memleket basshysynyń sózinshe, kez kelgen reformany jan-jaqty saraptap, baıyppen júrgizgen jón. Ekonomıka salalarynyń erekshelikterin eskere otyryp, túrli nusqalardy ázirleý kerek.
"Qosymsha qun salyǵyna qatysty buǵan deıin kózqarasymdy bildirmegen edim. Óıtkeni qyzmettik dárejeme sáıkes, meniń árbir sózim, pikirim qatań tapsyrma sııaqty qabyldanady. Soǵan qaramastan bul másele boıynsha oıymdy jetkizgim keledi. Qalaı desek te, qosymsha qun salyǵynyń mólsherlemesi saralanyp belgilenýge tıis”, dedi Qasym-Jomart Toqaev.
Úkimet túpkilikti sheshimdi bilikti sarapshylardyń, qaıtalap aıtamyn, bilikti sarapshylar men kásipkerlerdiń, álbette depýtattardyń pikirine qulaq asa otyryp, naqty esepteýler negizinde qabyldaǵany durys,- dep tapsyrma berdi prezıdent.
"Bir anyǵy, Úkimettiń qazirgi usynyp otyrǵan mólsherlemesi tym joǵary. Sizder naqty ıfrdy aıttyńyzdar. Ony qoǵam qyzý talqylady. Tipti, keı jaǵdaıda artyq sózder de aıtyldy. Degenmen, bul qoǵam talqysyna aldyn ala salynǵan usynys bolatyn. Taǵy qaıtalap aıtamyn, Úkimettiń bul baǵyttaǵy jumysy bıznes, qoǵam, kásipkerler, sarapshylardyń, ıaǵnı barlyq taraptyń pikiri eskerile otyryp jalǵasýy kerek. Bıyl naqty sheshim qabyldanýǵa tıis. Men buǵan deıin de aıttym: Úkimet bul máseleni depýtattarmen jáne sarapshylarmen egjeı-tegjeıli talqylaýy kerek. Búgin aıtylǵan oı-pikirler de eskeriledi. Memleketke barynsha ońtaıly sheshim qajet. Iaǵnı bir jaǵynan bıznes júrgizýge kedergi keltirmeı, qolaıly jaǵdaı jasaıtyn, al ekinshi jaǵynan, salyqqa qatysty tártipti kúsheıtip, bıýdjet kirisin arttyratyn tıimdi joldy tabýymyz qajet", – dedi Prezıdent.
