Ázerbaıjan resmı túrde Reseıdiń «Rossotrýdnıchestvo» agenttiginiń el aýmaǵyndaǵy qyzmetin toqtatý týraly nota joldady, dep habarlaıdy "Adyrna" ulttyq portaly Report agenttigine siltep.
«Rossotrýdnıchestvo» basshysy Evgenıı Prımakovtyń aıtýynsha, Ázerbaıjan tarapy Reseıdiń mádenı jáne aqparattyq ortalyǵy – «Orys úıi» zańdy tulǵa retinde tirkelýi tıis ekenin málimdegen. Sonymen qatar, mekeme bir jarym aı ishinde jalǵa alyp otyrǵan ǵımarattan shyǵýy qajet, sebebi ǵımarat ıesi ony jedel túrde satýǵa sheshim qabyldaǵan.
"Biz basqa ǵımaratty jalǵa alý týraly kelissózder júrgizdik, biraq onyń ıesi áli naqty sheshim qabyldaǵan joq", – dedi Prımakov.
Aqparat kózderiniń habarlaýynsha, resmı Baký ulttyq múddelerin qorǵaý saıasatyn jalǵastyryp, syrtqy yqpaldarǵa jol bermeıtinin kórsetýde.
"Bizdiń el sheteldik kómekti qajet etpeıdi. Ásirese, kúmándi shemalar arqyly kórsetiletin jáne barlaý sıpatyndaǵy qurylymdarmen baılanysty kómekti qabyldaýǵa nıetti emes", – dep atap ótti Report.
Aıta keteıik, buǵan deıin Ázerbaıjan amerıkalyq USAID agenttiginiń qyzmetin de toqtatý týraly sheshim qabyldaǵan bolatyn.
