AQSh-tyń prezıdenti Donald Tramp Izraıl premer-mınıstri Bınıamın Netanıahýmen birge Vashıngtonda ótken baspasóz máslıhatynda AQSh-tyń Gaza sektoryna ornalasýǵa jáne ol jerdiń ekonomıkasyn damytýǵa daıyn ekenin aıtty, dep habarlaıdy "Adyrna" ulttyq portaly BBC News-qa silteme jasap.
«Biz Gaza sektoryn baqylaýǵa alamyz jáne onda qaýipti jarylmaǵan bombalar men basqa da qarýlardy zalalsyzdandyryp, jerdi tegisteımiz, qırandylardan tazartamyz. Sonymen qatar, óńirde ekonomıkalyq damý men sheksiz jumys oryndaryn jáne turǵyn úıler salýdy qamtamasyz etemiz», – dedi Tramp.
Gaza sektoryn ol «joıylýǵa tıis aımaq» dep atady.
Netanıahýmen kezdesý aldynda Tramp Gaza turǵyndaryn Taıaý Shyǵystaǵy basqa aımaqtarǵa kóshirý týraly usynys jasady. Ol bul proesti qarjylandyrýdy óńirdegi memleketter óz moınyna alýy múmkin ekenin aıtty. Onyń pikirinshe, palestınalyqtardy Egıpet nemese Iordanııa aýmaǵyna kóshirýge bolady.
«Palestınalyqtar Gazada basqa amaldary bolmaǵandyqtan turyp jatyr. Qazir bul tek úıindilerden turatyn aımaq», – dedi Tramp.
Ol AQSh-tyń Gaza sektoryn «uzaq merzimge ıelenýin» kózdep otyrǵanyn jáne bul aımaqqa turaqtylyq ákelýi múmkin ekenin aıtty.
Netanıahý Tramptyń bul ıdeıasyn nazar aýdarýǵa turarlyq dep baǵalady.
«Izraıldiń basty maqsaty – Gaza aımaǵynyń bizdiń el úshin qaýip tóndirmeýin qamtamasyz etý. Al Tramp Gaza úshin basqa bolashaqty kórip otyr», – dedi Netanıahý.
Ol AQSh-tyń qoldaýyna alǵys aıtyp, Trampty «Aq úıdegi Izraıldiń eń úlken dosy» dep atady.
