Qoǵam qaıratkeri Amalbek Tshanov qoǵamdyq talqylaýda júrgen zańdardy shyǵarǵan mınıstrlerdi soqqynyń astyna alǵysy keletinin málimdedi. Bul týraly ol Sadaq Media You Tube arnasyna bergen suhbatynda aıtty, dep habarlaıdy “Adyrna” ulttyq portaly.
Amalbek Tshanov óz sózinde kólikti 5 mınýt qyzdyratyn, saǵat 4-te qap-qarańǵy ýaqytty belgilep bergen mınıstrlerdi urǵysy keletinin aıtty.
«Men qyzmette júrgende ártúrli jaǵdaılar boldy. Meniń bokspen aınalysqanymdy bári biledi. Ákimderdi urady eken degen áńgime shyǵyp ketken. Jumysta qataldyq kórsete bilip, aıtqan sózińe saı bolyp, tártipti ózińnen bastaý kerek. Qazir keıbir mınıstrlerdi jaqsylap soqqym keledi. Kólikti 5 mınýt qyzdyratyn, saǵat 4-te qap-qarańǵy ýaqytty belgilep bergen mınıstrlerdi urǵym keledi. Biz 80-nen astyq, qyzmet istedik biraz nárseni biletin shyǵarmyz desek, biz bilmeıtin dúnıeler kóp eken. Jastar adamnyń uǵymyna kirmeıtin dúnıelerdi oılap taýyp jatyr. Zamanǵa laıyqty shyǵar», — deıdi ol.
Sondaı-aq, saıasatker suhbat barysynda dindarlardy da synady.
«Dindarlar saǵan oqýdyń, bilim alýdyń qajeti joq dep júr. Qandaı da bir dastarhan basynda otyrsań, seni anaý kútip tur, mynaý kútip tur dep qorqyta beredi. Aıtatyndary tek ǵana jumaq. Jaqsy júrseń, jumaqtyń qyzdary bar, sharap ishesiń deıdi. Moldalardyń bárin bir kemege salyp, jumaqqa jiberý kerek. Bul ne masqara endi? Eger din taza bolsa, rýhymyzdy kóteredi. Bizde mýftılar boldy, solardyń ishindegi saýattysy, jaıdarysy — Ratbek qajy. Ol kisiniń aldynda basymdy ıemin. Qanshalyqty jupyny ári bilimdi adam. Sol kisini syıdyrmadyq qoı biz. Ishedi dedik, depýtat kezinde qolyn syndyrdy. Odan keıingi mýftılardyń turǵan úıin kórińizshi. Ondaı turmys bizdiń túsimizge kirmeıdi. Múftılar baryp meshit ashqanyna 5000-10 000 dollar alady. Ol Qudaıdyń úıin ashyp jatqan joq pa? Sonda olar Qudaıdan para alyp jatyr ma? Ne kútemiz osydan keıin? Qandaı din?», — deıdi Amalbek Tshanov.
