2023 jyly 191 000 qazaqstandyq, al byltyr 140 521 qazaqstandyq jumys isteý úshin shetelge ketken. Bul týraly Eńbek jáne halyqty áleýmettik qorǵaý mınıstrligi aıtty, dep habarlaıdy «Adyrna» tilshisi QazAqparatqa silteme jasap.
Otandastarymyz jumys barysymen jıi baratyn elder qatarynda Reseı, Ońtústik Koreıa, Túrkııa, Ulybrıtanııa jáne BAÁ bar.
Ulybrıtanııada eki jyl boıy maýsymdyq jumystarda jumys istegen Dýman Keńshilik kópshiliktiń shetelge ketýge umtylýyna jalaqy aıyrmashylyǵy men eńbek naryǵynyń jaı-kúıi sebep bolyp otyr deıdi. Aıtýynsha, Batys Eýropa elderindegi jalaqy men eńbek jaǵdaılary áldeqaıda jaqsy. Mysaly, Ulybrıtanııada jumys istegen birneshe aı Qazaqstandaǵy uqsas kásiptiń jyldyq tabysyna teń kiristi qamtamasyz ete alady. Sondyqtan kóptegen adam qysqa merzimde qarjylyq máselelerdi sheshý úshin osyndaı qadamǵa barady.
- Qazaqstanda IT salasynda maman bolyp jumys istedim, biraq jalaqy kúndelikti shyǵyndardy, atap aıtsaq, ıpoteka men jeke shyǵyndardy áreń japty. Sol sebeeti qosymsha tabys kózderin tabýǵa tyrystym. Bir sátte otandyq jarnama portaldarynyń birinen Ulybrıtanııada qulpynaı jınaý úshin jumysshylar qajet ekendigi týraly habarlandyrýdy kórdim. Jalaqy joǵary, al sharttary yńǵaıly boldy. Oılanbastan jumystan shyǵý týraly ótinish jazyp, Anglııaǵa bardym. Shetelde qıyn jumys isteý uıat emes, óıtkeni onda tabys joǵary. Jergilikti turǵyndar mundaı jumystarǵa qyzyǵýshylyq tanytpaıdy. Biz úshin jaqsy tabys olar úshin óte tómen jalaqy bolyp sanalady. Men qulpynaı jınaý jáne júk tasymaldaý salasynda jumys istedim. Jumys kúni 10-12 saǵatty qurady, al tabys saǵatyna 5000 teńgeden astam boldy»,—dedi ol.
Eýropada biliktiligi tómen jumystarda jumys isteýge tek qazaqstandyqtar ǵana , Ózbekstan, Qyrǵyzstan, Tájikstan, Rýmynııa jáne Bolgarııa azamattary da jıi qyzyǵýshylyq tanytady. Eń bastysy — eńbek qaýipsizdigi jáne kóshi-qon saıasaty erejelerin saqtaý. Atap ótý kerek, Eýropada jumys vızalary 3 aıdan 6 aıǵa deıin beriledi.
Eske salaıyq, ótken jyly 4 446 qazaqstandyq Ulybrıtanııaǵa, 3 000 - BAÁ-ge, 6 595 - Túrkııaǵa jáne 101 622-Reseıge jumys izdep ketken.
