QR Ekologııa jáne tabıǵı resýrstar mınıstrligi qazaqy ıt tuqymdary – tazy men tóbettiń qurmetine arnaıy mereke belgileýdi usyndy. Joba "Ashyq NQA" portalynda jarııalandy, dep habarlaıdy "Adyrna" ulttyq portaly.
Mereke kúnderiniń tizbesi jańa tarmaqpen tolyqtyrylady.
"11-1. Qazaqtyń ıt tuqymdary kúni – úshinshi qyrkúıek bolady", - delingen qujatta.
Mınıstrlik bul bastamanyń ulttyq mádenı murany, tarıh pen dástúrlerdi nasıhattaýda mańyzdy ról atqaratynyn atap ótti.
Mereke aıasynda dárister, semınarlar, kórmeler jáne basqa da is-sharalar uıymdastyrylyp, qazaqy ıt tuqymdarynyń erekshelikteri men kútimi týraly aqparat beriledi. Sondaı-aq, bul sharalar týrızmniń damýyna úles qosyp, kınologııa salasynda jańa jumys oryndarynyń ashylýyna yqpal etedi.
Mınıstrlik selekıonerler, kınologııalyq uıymdar men áýesqoılarǵa tájirıbe almasý jáne kórmelerge qatysý úshin jańa múmkindikter týǵyzatynyn atap ótti.
