«Betperde taqqan adam» ákesinen jáne tórt baýyrynan aıyrylǵan jasóspirimmen kezdesti, dep habarlaıdy "Adyrna" ulttyq portaly.
Stanıslav esimdi azamat Petropavldaǵy kolledjderdiń birinde oqyp, jataqhanada turady. Ol on shaqty kún buryn jaqyndarynan aıyrylǵan.
"Úıimiz órtengende men Petropavlda, jataqhanada boldym. Órttiń neden shyqqany ázirge belgisiz, biraq elektr symdarynyń qysqa tuıyqtalýy sebep bolýy múmkin. Ári úıde kómirqyshqyl gazy bolǵan. Ákem 40 jasta, ápkem — 18-de, qaryndasym 13-te, inim 10-da jáne eń kishkentaıymyz 7-de ǵana boldy. Jeti jyl buryn anam qaıtys boldy. Meniń kózim nashar kóredi, -4. Baýyrlarymdy qalaǵa áketip, oqytý armanym bolatyn. Bul armanymnan aıyryldym, ári qaraı ne isteıtinimdi bilmeımin", — dedi jasóspirim «betperdeli adammen» áńgime barysynda.
Bir sátte otbasynan aıyrylǵan bala qazir jalǵyzdyqtyń kúıin keship júrgenin aıtty.
"Seniń basyńnan ótkergen qıyndyqty eshkimniń basyna bermesin, sen jalǵyz emessiń, munyń bárinen biz birge ótemiz. Budan bylaı saǵan oqýymdy qalaı tóleımin dep ýaıymdaýdyń keregi joq, sondaı-aq kózińdi emdeýge de kómektesemiz. Endi ózińniń baspanań da bolady", — dedi kómek qolyn sozatynyn aıtqan azamat.
