Qazaqstandyq kásibı sýmo sheberi Ersin Baltaǵul (Kımbodzan Harýkı) Japonııanyń Tokıo qalasynda ótken Haý basıo 2025 týrnırinde úshinshi orynǵa ıe bolyp, el tarıhyndaǵy mańyzdy jetistikke qol jetkizdi, dep habarlaıdy "Adyrna" ulttyq portaly.
Bul jeńisi arqyly Kımbodzan qazaqstandyq sýmo jankúıerleriniń maqtanyshyna aınaldy.
Týrnırdiń negizgi kezeńi aıaqtalǵan soń, úsh balýan — qazaqstandyq Kımbodzan Harýkı, mońǵol Hosıorıý Tomokaý jáne japondyq Oho Konosýke birdeı nátıje kórsetti. Chempıondy anyqtaý úshin qosymsha raýnd (Tomoe-sen) uıymdastyryldy. Bul raýndta balýan qarsylastardyń árqaısysyn eki ret jeńýi tıis bolatyn. Alǵashqy jekpe-jekte Hosıorıý Kımbodzandy jeńse, kelesi kezdesýinde japondyq Oho balýandy da jeńip, týrnır chempıony atandy. Nátıjesinde, Oho ekinshi orynǵa, al Kımbodzan úshinshi orynǵa ıe boldy.
Sheshýshi kúnge deıin Kımbodzan 12 jeńis jáne 2 jeńilispen kósh bastap turǵan bolatyn. Alaıda sońǵy kezdesýde japon balýany Oho Konosýkege ese jiberdi. Sol ýaqytta Hosıorıý da jeńiske jetip, nátıjesinde úsh balýan birdeı nátıje kórsetip, qosymsha mını-týrnır ótkizildi.
Kımbodzan – kásibı sýmo tarıhynda mundaı deńgeıge jetken alǵashqy qazaqstandyq balýan. Onyń shydamdylyǵy men tehnıkasy jankúıerler men sarapshylardyń joǵary baǵasyna ıe boldy. Ersin Baltaǵul aldaǵy ýaqytta chempıondyq ataq úshin qaıtadan kúresedi degen senim bar.
