Qazaqstan Respýblıkasynyń Premer-Mınıstri Álıhan Smaıylov Qazaqstanda ótken jyly iske asyrylǵan mańyzdy jobalar týraly málimdedi. Bul týraly ol «24KZ» telearnasyna bergen suhbatynda aıtty, dep habarlaıdy “Adyrna” ulttyq portaly.
«Birinshi kezekte Qazaqstanǵa strategııalyq mańyzdy aktıv – Qaraǵandy metallýrgııa kombınatynyń qaıtarylýyn atap kórsetken jón. Ótken jyldyń jeltoqsan aıynan bastap biz osy kompanııanyń sheteldik menshik ıesimen kúrdeli kelissózder júrgizdik jáne ınvestıııalyq ımıdjge nuqsan keltirmeı, el úshin tıimdi sharttar negizinde kelisimdi aıaqtadyq», — dedi Premer-Mınıstr.
Úkimet basshynyń aıtýynsha, endigi kezekte Qarmet jańa ınvestorynyń aldynda aldaǵy 3-4 jylda kásiporynǵa keminde $3mlrd jeke ınvestıııa salý mindeti tur, onyń ishinde $1,3 mlrd qarajat keler jyly baǵyttalýy tıis.
Premer-Mınıstr sondaı-aq bıyl «Astrahan-Mańǵyshlaq» sý qubyryn jańǵyrtý aıaqtalǵanyn atap ótti. Joba Atyraý jáne Mańǵystaý oblystarynyń turǵyndaryn aýyz sýmen qamtamasyz etý máselesin sheshýge kómektesedi.
Batys energııa torabynda jańa elektr jelileri salyndy. Osylaısha, Qazaqstannyń búkil batys aımaǵynyń tutynýshylaryn energııa qýatymen qamtamasyz etý edáýir artty. Bul – energetıkalyq qaýipsizdik úshin de, el ekonomıkasynyń damýy úshin de mańyzdy.
«Eń kúrdeli jobalardyń biri – Úlken Almaty aınalma joly (ÚAAAJ) aıaqtaldy. Onyń ashylýy trafıti azaıtýǵa jáne megapolıstegi ekologııalyq jaǵdaıdy jaqsartýǵa, sondaı-aq júk tasymaldaý áleýetin keńeıtýge múmkindik beredi», — dep atap ótti Álıhan Smaıylov.
Sonymen qatar Astanada JEO-3 birinshi kezegi, sondaı-aq jańa «Ońtústik-Shyǵys» jáne «Turan» gaz jylý stanııalarynyń qurylysy aıaqtaldy. Bul nysandar Astanany túgeldeı jylýmen jabdyqtaýǵa múmkindik beredi.
Batys Qazaqstan oblysynda «Rojkovskoe» iri gaz kondensaty ken orny ónerkásiptik paıdalanýǵa berildi. Ol jylyna shamamen 1 mlrd tekshe metr gaz jáne 500 myń tonna kondensat kózi bolady.
«Budan basqa Qyzylorda jáne Aqtóbe oblystarynda taǵy eki ken orny paıdalanýǵa berildi. Olar – “Ońtústik Aqsaı” jáne “Shyǵys Óriktaý” ken oryndary. Orta merzimdi perspektıvada Aqtóbe, Atyraý jáne Mańǵystaý oblystarynda taǵy úsh ken orny iske qosylady dep kútilýde», — dep atap ótti Premer-Mınıstr.
Sonymen qatar bıyl uzyndyǵy 300 km asatyn «Beıneý-Jańaozen» magıstraldyq gaz qubyry iske qosyldy. Sonyń nátıjesinde Mańǵystaýda turaqty gazben jabdyqtaý máselesi sheshildi.
«Biz eldiń shyǵysy men ońtústiginde uzyndyǵy 1300 km asatyn tórt strategııalyq mańyzy bar temirjol jelileri qurylysyn bastadyq. Jalpy, men keıbir mańyzdy jobalardy ǵana atap óttim. Is júzinde mundaı respýblıkalyq jáne óńirlik mańyzy bar jobalar óte kóp. Biz olardy iske asyrý boıynsha jumysty jalǵastyramyz», — dep qorytyndylady Álıhan Smaıylov.
