AQŞ prezidentı Donald Tramp Ormuz būǧazyn jaqyn arada AQŞ aumaǧy dep jariialau mümkın. Ol būl turaly Long-Ailendtegı polisiia akademiiasynda söilegen sözınde aitty, dep habarlaidy "Adyrna".
Tramptyŋ sözınşe, AQŞ İranǧa qarsy äskeri operasiiany aiaqtaǧannan keiın būǧazǧa qatysty osyndai şeşım qabyldauy yqtimal.
«İrandy talqandaudy aiaqtaǧannan keiın, men jaqyn arada Ormuz būǧazyn AQŞ aumaǧy dep jariialaimyn. Negızınde, ol qazırdıŋ özınde solai. Bız būǧazǧa blokada qoidyq. Eger qalamasaq, eşbır keme būǧazdan öte almaidy», – dedı Tramp.
Ormuz būǧazy älemdık energetika naryǧy üşın asa maŋyzdy strategiialyq teŋız joly sanalady. Älemde teŋız arqyly tasymaldanatyn mūnaidyŋ şamamen besten bır bölıgı osy būǧaz arqyly ötedı. Sondyqtan ondaǧy kez kelgen äskeri nemese saiasi şielenıs mūnai baǧasy men jahandyq jetkızu tızbegıne tıkelei äser etuı mümkın.
Alaida Tramptyŋ mälımdemesı AQŞ-tyŋ naqty saiasatyna ainala ma, älde saiasi mälımdeme küiınde qala ma — äzırge belgısız.
İran tarapy Vaşingtonnyŋ qysymyna könbeitının bıldırdı. İran Syrtqy ıster ministrınıŋ orynbasary Qazem Ǧaribabadi Ormuz būǧazyn aşu nemese jabu turaly şeşım Tegerannyŋ qūzyrynda ekenın mälımdedı.
Al İran Syrtqy ıster ministrı Abbas Araqchi AQŞ-pen kelıssözderdı qaita bastau jönınde äzırge naqty şeşım qabyldanbaǧanyn aitty. Onyŋ pıkırınşe, Katar men Päkıstan arqyly jürgızılıp jatqan bailanystardy resmi kelıssöz dep atauǧa bolmaidy. Al Omanmen jürgızılgen konsultasiialar Ormuz būǧazy arqyly teŋız qatynasyn qalpyna keltıru mäselesıne baǧyttalǧan.
Būǧan deiın Tramp AQŞ būǧazǧa «tolyq baqylau» ornatqanyn aitqan edı. Degenmen Ormuz būǧazy İran men Omannyŋ arasyndaǧy halyqaralyq maŋyzy bar teŋız joly bolyp sanalady.
Äskeri qaqtyǧys pen teŋız tasymalyna bailanysty qiyndyqtar aiasynda janarmai baǧasy da qymbattady. Tramp amerikalyqtardyŋ benzin üşın köbırek tölep jatqanyn moiyndaǧanymen, İranǧa qarsy jürgızılıp jatqan saiasatty aqtaitynyn jetkızdı.
Öz kezegınde İran AQŞ-tan saiasatyn özgertıp, soǧys saldarynan kelgen şyǧyndy öteudı, sanksiialardy alyp tastaudy jäne būǧattalǧan irandyq aktivterdı bosatudy talap etıp otyr.
