«Mańǵystaýmunaıgaz» kompanııasyna 31 mlrd teńge aıyppul salyndy. Bul týraly búgin Bas prokýratýranyń baspasóz qyzmeti málimdedi, dep habarlaıdy «Adyrna» tilshisi.
Mańǵystaý oblysynyń prokýratýrasy kompanııa qyzmetinde aǵyndy sýdy jer qoınaýyna jiberý, sondaı-aq tıisti shekteý ornatpaı, burǵylaý qaldyǵyn jınaqtaýmen baılanysty óreskel zań buzýshylyqtar anyqtaǵan.
«Sottyń 04.12.2024 jylǵy qaýlysymen kompanııa Ákimshilik quqyq buzýshylyq týraly kodekstiń 328-babymen ákimshilik jaýapkershilikke tartylyp, 31 mlrd teńge kóleminde aıyppul salyndy. Sot aktisi zańdy kúshine endi»,—delingen habarlamada.
Sondaı-aq munaı jylytý peshinen qorshaǵan ortaǵa lastaýshy zattardyń shamadan tys shyǵarylý faktisi de anyqtalyp, 1,2 mlrd teńge aıyppul salyndy.
Eske salaıyq, ótken jyldyń 2 jeltoqsanynda «Mańǵystaýmunaıgaz» AQ bas dırektory bolyp Ven zıazıýn taǵaıyndalǵan edi.
