Úkimet otyrysynda Mańǵystaý oblysynyń ákimi Nurdáýlet Qılybaı Jumysshy mamandyqtary jylyn ótkizý jónindegi is-sharalar jospary bekitilgenin jáne óńirlik shtab óz jumysyna kiriskenin habarlady.
2025–2026 jyldary oqý-zerthanalyq korpýsyn ashý, jańa ıdeıalar hakatonyn, halyqaralyq «DostiSkills-2025» salalyq chempıonatyn, halyqaralyq salalyq akkredıtteýdi ótkizý josparlanyp otyr. Sondaı-aq IT hub jáne jumys berýshilerdiń qoldaýymen quziretter ortalyǵyn ashý, bıznestiń naqty suranystary boıynsha nysanaly bilim berý tapsyrysyn ulǵaıtý jáne óńir kolledjderinde jańa mamandyqtar ashý qarastyrylǵan. Atap aıtqanda, N. Bekbosynov atyndaǵy Mańǵystaý energetıkalyq kolledji «Sýmen jabdyqtaý jáne sý burý júıeleriniń tazartý qurylystaryn paıdalaný», O. Turmaǵambetuly atyndaǵy Mańǵystaý ındýstrııalyq-tehnıkalyq kolledji «Gıdrogeologııa jáne ınjenerlik geologııa» mamandyǵy boıynsha kadr daıarlaıdy.
Qazirgi ýaqytta kolledjderdiń bilim berý baǵdarlamalary Jańa mamandyqtar atlasynyń ózekti talaptaryna saı bolý úshin jańartylýda.
«Óńirde 2022 jyly eńbek naryǵyna saı jańa mamandyqtar ashý, jumyspen qamtýdyń turaqtylyǵyn qamtamasyz etý maqsatynda “Jańa mamandyqtardyń atlasy” iske asyrylyp, suranysqa ıe bilim berý, týrızm, munaı-gaz salasyndaǵy mamandyqtar aıqyndaldy. Nysanaly qarjylandyrý sheńberinde Esenov atyndaǵy ýnıversıtet joǵary oqý granty negizinde byltyr jáne bıylǵy jyldarǵa Mańǵystaý oblysynyń jańa kásipter men quzirettilikter atlasy jumystary jalǵastyrylýda. Osy jylǵa qurylys, energetıka, logıstıka salalaryna basymdyq berilip otyr. Qazirgi tańda osy Atlasqa sáıkes tehnıkalyq jáne kásiptik bilim uıymdarynyń bilim berý baǵdarlamalary boıynsha mıkrobiliktilikterdi jańartý jumystary júrgizilýde. Kolledjderde salaǵa beıindeý jumystary kezeń-kezeńimen júrgizilýde. Bilikti mamandardy daıarlaý 89 mamandyqtyń 129 biliktiligi boıynsha oqytylýda. 2024-2025 oqý jylyna 65 mamandyqtyń 92 biliktiligi boıynsha 5615 orynǵa, bul 90%-y memlekettik bilim berý granty bólindi. Onyń ishinde 70 jumys berýshi men kolledj arasynda kelisim-shart negizinde naqty suranysyna sáıkes memlekettik bilim berý grantyna 580 stýdent qabyldandy. Ol bizdiń óńirdegi “Kazkor-Transservıs”, “Ozenspestroı”, “QazAzot” sekildi iri-iri mekemeler», — dep atap ótti Mańǵystaý oblysynyń ákimi Nurdáýlet Qılybaı.
Kolledjderdiń materıaldyq-tehnıkalyq bazasyn jaqsartý úshin 2025 jylǵa qaraı Mańǵystaý ındýstrıaldy-tehnıkalyq kolledjinde emhananyń burynǵy ǵımaratyn oqý-zerthanalyq korpýsqa qaıta josparlaý júrgizilýde, Beıneý aýdanyndaǵy eki kolledj úshin jańa ǵımaratty jobalaý daıyndalýda.
