UzAuto Motors bas dırektory Bý Inge Andersson qyzmetinen ketti, dep habarlaıdy "Adyrna" ulttyq portaly.
Bý Inge Andersson UzAuto Motors jáne UzAuto Motors Powertrain kompanııalarynyń bas dırektory qyzmetin atqardy.
Onyń qyzmetten ketýiniń sebebi jarııalanǵan joq.
Oǵan arnalǵan saltanatty shara barysynda shved mamanynyń Ózbekstandaǵy avtomobıl ónerkásibin damytýǵa qosqan úlesi erekshe atalyp ótti. Anderssonnyń basshylyǵymen kompanııa birqatar jetistikterge qol jetkizgen. Ol basshylyq etkende 2023 jyly 395,4 myń avtomobıl shyǵarylyp, bul kórsetkish 2022 jylmen salystyrǵanda 20%-ǵa ósti. 2024 jyly da óndiris kólemi joǵary bolady dep kútilýde.
Sondaı-aq, Chevrolet Tracker jáne Chevrolet Onix modelderi jappaı óndiriske shyǵaryldy. Kompanııa TMD men Ortalyq Azııada jeńil avtomobılder óndirý boıynsha kóshbasshy atandy. Ózbekstan Chevrolet úshin álem boıynsha ekinshi mańyzdy naryq boldy. Óndiristegi jergilikti quramnyń úlesi 50%-dan asty.
Bý Inge Andersson 2021 jyldyń tamyzynda UzAuto Motors bas dırektory bolyp taǵaıyndalǵan. Buǵan deıin ol 2017 jyldan bastap japondyq Yazaki kompanııasynyń Eýropalyq bólimshesin basqarǵan, al 2009-2013 jyldary «GAZ toby» prezıdenti qyzmetin atqarǵan.
