Aqtaýda opat bolǵan ushaqqa qatysty jańa derekter belgili boldy, dep habarlaıdy "Adyrna" ulttyq portaly QazTAG-qa siltep.
Agenttiktiń málimetinshe, Flightradar24 saıty Bakýden Groznyıǵa ushyp bara jatqan J28243 reısimen baılanysty málimetterge nazar aýdarǵan. Áýe kemesi keshe Qazaqstannyń Aktaý qalasyna jaqyn mańda apatqa ushyraǵan.
Flightradar24 kartasyndaǵy málimetterge sáıkes, ushaq Mahachqala mańynda radardan joǵalyp, 12 mınýttan keıin Soltústik Osetııanyń Ardon qalasy mańynda qaıta paıda bolǵan. Onda ushaq biraz ýaqyt aınalyp ushyp, qaıta joǵalyp ketip, 1,5 saǵattan keıin Kaspıı teńizi ústinde Aktaý mańynda kóringen. Bul derekter boıynsha reıstiń baǵytynda belgisiz jaǵdaılardyń bolǵany kúmán týdyrdy.
Apattyń sebebi ushaq qozǵaltqyshyna qus túsýi bolýy múmkin degen aqparat tarady. Bul derekti Reseıdiń avıaııa ókili Artem Korenıako rastady.
Qazir apat bolǵan jerde 287 qutqarýshy men 65 tehnıka jumys istep jatyr. Sońǵy derekterge sáıkes, apattan 29 adam zardap shekti. 38 adam, onyń ishinde alty qazaqstandyq, qaza tapty. Qaza bolǵan qazaqstandyqtardyń arasynda balalar da bar.
Qazaqstan prezıdenti Qasym-Jomart Toqaev apatqa baılanysty Ázerbaıjan prezıdenti Ilham Álıevke kóńil aıtty.
