Sońǵy jyldary Qazaqstanda qumar oıyndarǵa táýeldilik (lýdomanııa) kúrdeli máselege aınaldy. Áleýmettik jeliler men jarnamalar arqyly qoljetimdi bolǵan oıyn bıznesi kóptegen azamattardy ózine tartyp, olardyń ómir sapasyna áser etýde.ej
Elimizde resmı derekter boıynsha, 200 myńnan astam adam qumar oıyndarǵa tartylǵan. Onyń ishinde jastardyń úlesi aıtarlyqtaı. Bul táýeldilik kóbine áleýmettik jaǵdaıy nashar, jumyssyz nemese qıyndyqtarǵa tap bolǵan adamdar arasynda jıi kezdesedi. Oıynǵa ketken aqsha otbasynyń bıýdjetine aýyr salmaq túsiredi, al táýeldilik saldary psıhologııalyq kúızeliske, tipti otbasylyq daǵdarysqa alyp kelýi múmkin.
Lýdomanııaǵa shaldyqqan adamdardyń basym kópshiligi óziniń táýeldiligin baıqamaıdy nemese moıyndaǵysy kelmeıdi. "Bul – ýaqytsha qumarlyq", "kelesi joly utamyn" degen jalǵan úmitpen qarjylyq qıyndyqtarǵa tap bolady. Mamandardyń aıtýynsha, qumar oıyndarǵa táýeldilik birte-birte adamnyń óz-ózin baqylaý qabiletinen aıyrýy múmkin.
Qazaqstanda bul máseleni sheshý úshin arnaıy baǵdarlamalar men psıhologııalyq qoldaý qyzmetteri qajet. Qumar oıyndarǵa qarsy zańnamany kúsheıtý, jastardy aqparattandyrý, otbasylarǵa kómek kórsetý – bul táýeldiliktiń aldyn alýdyń birden-bir joly. Eń bastysy, kez kelgen táýeldilikke beı-jaı qaramaý kerek.
Eger siz nemese sizdiń jaqyndaryńyz qumar oıyndardan zardap shegip jatsa, ýaqytynda qoldaý kórsetip, mamandarǵa júgingen durys. Sebebi, qumar oıyndarǵa táýeldilik – tek bir adamnyń máselesi emes, bul búkil qoǵamǵa qatysty mańyzdy másele.
