QR qorǵanys mınıstrligi Qarýly Kúshterdiń barlyq áskerı basqarý organdary, bólimderi men mekemeleri jańa jaýyngerlik oqý kezeńiniń bastalýyna baılanysty joǵary jaýyngerlik ázirlik deńgeıine jetkiziletinin málimdedi, dep habarlaıdy "Adyrna" ulttyq portaly mınıstrliktiń resmı habarlamasyna siltep.
Mınıstrliktiń habarlaýynsha, jeltoqsan aıynyń basynda ásker bólimsheleri dabyl boıynsha kóterilip, polıgondar men oqý-jattyǵý ortalyqtaryna marsh jasaıdy. Jeke quram men áskerı tehnıkany jattyǵý oryndaryna jetkizý úshin keshendi taktıkalyq-saptyq sabaqtar ótkiziledi.
Oqý-jattyǵýlarǵa baılanysty óńirlerdegi joldardyń keıbir ýchaskelerinde ýaqytsha qozǵalys shektelýi múmkin. Mınıstrlik azamattardan jalǵan aqparat taratpaýdy jáne tek resmı derekkózderge senýdi surady.
Prezıdent Qasym-Jomart Toqaev 22 qarashada premer-mınıstrge, quqyq qorǵaý organdarynyń basshylaryna jáne ákimderge Ýkraına tóńiregindegi jaǵdaıdyń ýshyǵýyna baılanysty negizgi áskerı jáne azamattyq nysandardyń qaýipsizdigin qamtamasyz etý boıynsha shuǵyl sharalar qabyldaýdy tapsyrǵan bolatyn.
