Ulttyq bank dollar baǵamynyń ósýine qatysty málimdeme jasady, dep habarlaıdy "Adyrna" ulttyq portaly.
Ulttyq bank málimetinshe, birqatar faktor áserinen teńgeniń aıyrbas baǵamy AQSh dollaryna shaqqanda 500 teńgeden asqan.
"Qazir bırjadaǵy saýda-sattyq 1 AQSh dollary úshin 518-519 teńge aralyǵynda ótip jatyr. Keshegi kúnnen bastap 2,4 paıyzǵa álsiregendikten, 28 qarashadaǵy teńgeniń ortasha saralanǵan baǵamy - AQSh dollary úshin 512,58 teńge", - dep jazylǵan bank habarlamasynda.
Ulttyq bank syrtqy jáne ishki faktorlar valıýta baǵamyna teris áser etetinin aıtyp, málimdeme jasady.
"AQSh dollarynyń jahandyq nyǵaıýy, shıkizat qunynyń ózgerýi jáne álemdegi geosaıası jaǵdaıdyń shıelenisýi sııaqty birqatar syrtqy faktor ózgerýi aıasynda damýshy naryqtardaǵy valıýtalardyń teris dınamıkasy barlyq jerde baıqalady. Negizgi álemdik valıýtalarǵa qatysty AQSh dollarynyń baǵamyn baqylaıtyn DXY ındeksi aı basynan shamamen 2,2 paıyzǵa nyǵaıyp, 106,2 pýnktke deıin ósti (28 qarashada). EM valıýtalarynyń ındeksi aı basynan 3,0 paıyzǵa tómendedi (28 qarasha boıynsha)", - dep jazylǵan habarlamada.
