«Qazaqstan temir joly» AQ basqarma tóraǵasy Nurlan Saýranbaev elimizde poıyzdar nege jıi keshigetinin túsindirdi. Bul týraly ol Úkimet otyrysynda aıtty, dep habarlaıdy “Adyrna” ulttyq portaly.
Úkimet otyrysynda premer-mınıstr Oljas Bektenov ulttyq kompanııa basshysyna «Nurlan Ermekuly, sońǵy ýaqytta turǵyndar tarapynan poıyzdardyń keshigýine qatysty shaǵymdar kóbeıdi. Qandaı sharalar qabyldap jatyrsyzdar?» dep suraq qoıdy.
Saýranbaev mundaı problema baryn moıyndady.
«Bizdiń kompanııada bul másele erekshe baqylaýda tur. Osy jaǵdaı jol jóndeý jumystary jáne jolaýshylardyń qaýipsizdigine baılanysty. Sońǵy jyldary biz jol jóndeý jumystaryn 2 ese kóbeıttik. Jolaýshylardyń aldynda keshirim ótinip, ári jaǵdaıǵa túsinikpen qaraýdy suraımyz», – dedi QTJ tóraǵasy.
