Prezident Qasym-Jomart Toqaev Ūlttyq qauıpsızdık komitetıne (ŪQK) jaŋa qyzmetter jüktedı, dep habarlaidy "Adyrna" ūlttyq portaly.
Memleket basşysy 1996 jylǧy 1 säuırdegı №2922 «Qazaqstan Respublikasy Ūlttyq qauıpsızdık komitetı turaly erejenı bekıtu turaly» Prezident jarlyǧyna özgerıster men tolyqtyrular engızu jönındegı qūjatqa qol qoidy. Jaŋartular ŪQK-nyŋ qarjylyq monitoring jäne memlekettık materialdyq rezervterdı basqaru salasyndaǧy ökılettıkterın keŋeitudı közdeidı.
Qūjatqa säikes, ŪQK zaŋsyz jolmen alynǧan kırısterdı zaŋdastyruǧa, terrorizmdı qarjylandyruǧa jäne jappai qyryp-joiu qaruyn taratudy boldyrmauǧa qarsy ıs-qimyl jönındegı uäkılettı organnyŋ sūrauy boiynşa öz aqparattyq jüielerınen tiıstı mälımetter ūsynatyn bolady.
Sonymen qatar, özgerıster ŪQK-nyŋ memlekettık materialdyq rezervter salasyndaǧy funksiialaryn naqtylaidy. Atap aitqanda, komitet materialdyq qūndylyqtardyŋ nomenklaturasy men saqtau kölemı boiynşa ūsynystar engızedı, mobilizasiialyq rezervten qūndylyqtardy qaryzǧa beru nemese jaŋartu tärtıbımen şyǧaru mäselelerın şeşedı, materialdyq qūndylyqtardy saqtau, jaŋartu jäne memlekettık organdar arasynda tasymaldaudy ūiymdastyrady jäne rezervterdı saqtau jäne qalyptastyruǧa jūmsalatyn şyǧyndar boiynşa Ükımetke ūsynystar daiyndaidy.
Jarlyqtyŋ negızgı erejelerı 9 jeltoqsannan bastap küşıne endı. Al memlekettık materialdyq rezervterge qatysty jekelegen normalar 2027 jylǧy 1 qaŋtardan bastap qoldanylady.
