Jelide kúdikke ilingen Perızat Qaıratqa qatysty túrli aqparat tarap jatyr, dep habarlaıdy “Adyrna” ulttyq portaly.
Sý tasqynynan zardap shekkenderge jınalǵan 1,5 mıllıard teńgeni jymqyrdy degen kúdikke ilingen erikti Perızat Qaıratpen “birge oqydym” degen áıel adam jelide vıdeo jarııalady.
Onyń sózinshe, ol Perızatpen bir kolledjde oqyǵan. Sondaı-aq, vıdeo júktegen áıel adam Perızattyń jataqhanada telefon urlap, oqýdan shyqqanyn aıtqan.
Beıtanys boıjetenniń vıdeosy Instagram jelisindegi abdulla_kz paraqshasynda jarııa boldy. Onda beınedegi qyz estrada-ırk kolledjinde Perızat Qaıratpen birge oqyǵanyn aıtqan.
“Sol kezde Aqtaýdyń kolledjinen 2-kýrsqa Qasenǵalıeva Perızat degen qyz aýysyp keldi. Bir jarty jylǵa jetpeıtin az ýaqyt ishinde onyń artynan jataqhanada telefon, kameralardy urlap, sonyń aqshasymen kún kóretini týraly áńgime taraıdy. Ol qyzdy keıin tipti oqýdan shyǵaryp jiberdi. Keıde sol qyz qaıda ketti eken dep oılaıtyn edim”, – dedi ol.
Ol jelidegi aqparatqa mán bermegenin de aıtty.
“Keıin TıkToktan bir qaıyrymdylyq qordyń basshysy ustalyp jatyr eken degen aqparatty kórdim. Biraq mán berip qaraǵan joqpyn. Ótkizip jiberdim. Keıin qaraımyn dep júrip, umytyp ketippin. Búgin meniń muǵalimimnen habarlama keldi. “Mynaý bizde oqyǵan Qasenǵalıeva Perızat pe?” dep surapty. Ashyp qarasam dál ózi eken. “Aýrý qalsa da, ádet qalmaıdy” dep halyq beker aıtpaıdy eken ǵoı. Stýdent kezinde sol urlyǵy úshin oqýdan shyǵaryp jiberip edi, endi qazir búkil Qazaqstan biletindeı ustalyp jatyr”, – dep qorytty ol.
Aıta keteıik, Astana qalalyq soty Perızat Qaırattyń eki aıǵa qamaýǵa alynǵany týraly habarlaǵan bolatyn.
