2025 jyl – Jūmysşy mamandyqtar jyly aiasynda Almaty qūrylys-tehnikalyq kolledjınde baspasöz tury ūiymdastyryldy. Is-şara barysynda qonaqtar oqu ornynyŋ materialdyq-tehnikalyq bazasymen tanysyp, studentterdıŋ täjıribeden qalai ötetının öz közderımen kördı.
Kolledjde bügınde 41 oqu kabinetı, sport jäne akt zaly, jataqhana men ülken kıtaphana jūmys ısteidı. Eŋ bastysy – oqu prosesıne qajet toǧyz şeberhana men zerthana studentterdıŋ erkın bılım aluyna jaǧdai jasap otyr. Zamanaui qūrylǧylar ornatylǧan zerthanalarda jastar tek teoriiany ǧana emes, naqty täjıribenı meŋgeredı.
Osyǧan bailanysty kolledj direktory Bektūrǧan Ahmetov oqu ornynyŋ artyqşylyqtaryna toqtaldy:
«Bızdıŋ kolledj 1969 jyly qūrylǧan. Qazırgı taŋda 8 mamandyq boiynşa 1200-den astam student bılım aluda. Jyl saiyn jūmysşy mamandyqtaryna qyzyǧuşylyq artyp keledı. Biyl studentter sany byltyrǧydan 50-ge köp. Bız Almatyda santehnika jäne jylu jüiesı boiynşa bıregei mamandar daiyndaimyz. Jaqynda “Haus-master” mamandyǧyn aştyq. Būl mamandyq santehnik, elektrik, dänekerleuşı qyzmetterın bırıktıredı. Studentterımız halyqaralyq jarystarda el namysyn qorǧap jür», – dedı ol.
Kolledj dästürlı bılım berumen şektelmeidı. Mūnda studentterdıŋ käsıpkerlık daǧdysyn qalyptastyru üşın «Business Startup» ortalyǧy jūmys ısteidı. Sondai-aq, «Dänekerleu ısı» baǧyty europalyq standarttarǧa säikes baǧalanyp, joǧary deŋgeide moiyndalǧan. Mūnyŋ bärı jastardyŋ bäsekege qabılettı boluyna yqpal etedı.
Osy mümkındıkterdı paidalanyp jürgen studentterdıŋ bırı – santehnika mamandyǧyn meŋgerıp jürgen Dmitrii Klimov. Ol özınıŋ taŋdauy men jetıstıkterı turaly aitty:
«Būl sala ärqaşan qajet. Chempionattarda baq synap, bırınşı oryn alǧanym bar. Qazır halyqaralyq deŋgeide öner körsetuge daiyndalyp jürmın. Kolledj maǧan ülken mümkındık berdı, mūǧalımderımız köp närsege üirettı. Bolaşaqta öz kompaniiamdy aşyp, elge paidaly käsıpker bolǧym keledı», – dedı jas maman.
Jastardyŋ jetıstıgı täjıribelı ūstazdardyŋ eŋbegımen tyǧyz bailanysty. Oqytuşylar studentterdı bırınşı kurstan bastap, syzba syzuǧa, qūrylys materialdaryn tanuǧa, keiınnen şynaiy şeberhanalarda eŋbek etuge baulidy. Sabaq barysynda jastardyŋ qatelıkterın tüzetıp, baǧyt-baǧdar berıp otyrady. Uaqyt öte olar derbes jūmys ıstei bastaidy, būl bolaşaq mamandardyŋ käsıbi bılıgın arttyrady.
Osy jaiynda oqytuşy Janar Qarataeva pıkır bıldırdı:
«Bız studentterdı qarapaiym syzbadan bastap, kürdelı qūrylys jūmystaryna deiın üiretemız. Alǧaşqy künderı baqylap qana jürse, uaqyt öte özderı erkın jūmys ıstei bastaidy. Qazırgı jastar mamandyqty jürek qalauymen taŋdap jatyr. Prezidentımız aitqandai, jūmysşy kadrlar qoǧamnyŋ tıregı boluy tiıs», – dedı ol.
Kolledjdıŋ eŋ ülken artyqşylyqtarynyŋ bırı – dualdı oqytu jüiesı. Iаǧni studentter tek teoriialyq bılımmen şektelmei, serıktes käsıporyndarda öndırıstık täjıribeden ötedı. Būl täjıribe jihaz fabrikalarynan bastap IT-kompaniialarǧa deiın qamtidy. Mūndai ädıs jas mamandardyŋ käsıbi tūrǧyda jetıluıne, bolaşaqta jūmysqa tez beiımdeluıne mümkındık beredı.
Master Almas Qūrniiazov ta şeberhanalardyŋ jūmysyn tanystyryp öttı:
«Bızdıŋ şeberhanalar zamanaui qūrylǧylarmen jabdyqtalǧan. Metall öŋdeu, dänekerleu jäne qūrylys jūmystarynda studentter halyqaralyq deŋgeide daiyndalady. Byltyr şäkırtımız Fransiiada ötken WorldSkills chempionatynda jülde aldy. Biyl taǧy bırneşe studentımız şetelge joldama alyp otyr», – dedı ol.
Almaty qūrylys-tehnikalyq kolledjı bügınde bılım, täjıribe jäne halyqaralyq bailanystardy üilestıre otyryp, eŋbek naryǧyna sūranysqa ie bılıktı kadrlar daiarlap keledı.
