Aqtóbe oblysynda qorǵanys mınıstrligine tıesili tikushaq qulap, bir adam qaza tapty, dep habarlaıdy "Adyrna" ulttyq portaly QazTAG agenttigine siltep.
Odan bólek, eki adam zardap shekti.
«Martók aýdanynyń Hlebodarovka aýyly mańynda tikushaq qulady», – delingen agenttik aqparatynda.
Aqtóbe oblysynyń densaýlyq saqtaý basqarmasynda qalaǵa eki naýqas jetkiziletini de aıtylǵan.
«Aerodromda eki jedel járdem brıgadasy kútip tur. Reanımatologtar, travmatologtar jáne kombýstıologtardan quralǵan shuǵyl brıgada MOB qabyldaý bólmesinde kútip otyr», – dep qosty oblystyq densaýlyq saqtaý basqarmasy.
Apatqa qatysty tótenshe jaǵdaılar mınıstrligi de aqparat berdi. Derekte áýe kemesiniń «qatty qonýy» týraly habarlaǵan.
«Búgin, 9 qarasha kúni 11:40-ta «112» qyzmetine Mártók aýdanynyń Saryjar aýyly mańynda tikushaqtyń «qatty qonýy» týraly habar tústi. Áýe kemesi, aldyn ala málimet boıynsha, QR Qorǵanys mınıstrligine tıesili. Oqıǵa ornyna TJD kúshteri men quraldary: bes tehnıka jáne 23 adam jiberildi. Oqıǵa ornyna jetken TJM qutqarýshylary órtti sóndirdi. MI-8 úlgisindegi tikushaq bortynda úsh adam bolǵan. Sonyń biri qaza tapty. Eki zardap shekken azamat Aqtóbe qalasyna QR QM VISVO IaK-40 ushaǵymen jetkizildi. Oqıǵa týraly aqparat naqtylanýda», – dep habarlady TJM.
Ótken jyly Taldyqorǵandaǵy áskerı aerobazada jaýyngerlik ushaqty daıyndaý kezinde áskerı qyzmetshi qaza tapqan bolatyn.
