Májilis depýtaty Ashat Aımaǵambetov Qazaqstannyń bıýdjeti týraly aıtty, dep habarlaıdy "Adyrna" ulttyq portaly Dalanews.kz-ke siltep.
Aqparat agenttiginiń habarlaýynsha, bıýdjet qarajatyn jumsaýda Úkimet pen Qarjy mınıstrligine berilgen keń quzyretterdiń esebi tómen, naqty erejeler men talaptar tolyq anyqtalmaǵan. Al bul óz kezeginde qarjynyń tıimsiz ári josparsyz jumsalýyna ıtermelep jatyr.
“Nátıjesinde bastapqyda bekitilgen bıýdjet pen onyń maqsattary túbegeıli ózgeristerge ushyraıdy, al mańyzdy máseleler kóp jaǵdaıda kabınet ishinde ǵana sheshiledi. Mundaı jaǵdaı bıýdjettiń tıimdiligine jáne eldiń qarjylyq turaqtylyǵyna keri áserin tıgizýde”, - dedi ol.
Depýtat qarajattyń qaıta bólinýine de toqtaldy.
“Bul úderisti retteıtin naqty erejeler men reglamentter joq. Jańa Bıýdjet kodeksi jobasynda baǵdarlamalardy irilendirý jáne mınıstrlikterge odan da úlken derbestik berý kózdelýde. Alaıda esep pen naqty mindettersiz, bilikti mamandarsyz jáne memlekettik josparlaýdyń tıimdi júıesinsiz mundaı derbestik qaýipti bolýy múmkin. Ishki oryndaý jáne baqylaý mehanızmderin ózgertpeı, syrtqy bloktyq qurylymdy engizý máseleni sheshpeıdi, kerisinshe, ony ýshyqtyrýy yqtımal. Eger bul úrdis jalǵasa berse, bolashaqta Parlamentte árbir mınıstrlikke jalpy soma ǵana bekitilip, al mınıstrlikter ishki qarajatty óz qalaýy boıynsha bóle beretin jaǵdaıǵa jetýimiz múmkin. Bul bıýdjetti bekitýdiń mánin joǵaltýǵa ákeledi”, - dep atap ótti ol.
Búginde Ulttyq qor qarajatyna da qatysty naqty talaptardyń bolmaýy kúrdeli máselege aınalǵan.
“Ulttyq qordan kepildendirilgen transfertter úkimetti shekteıtindeı kóringenimen, is júzinde úkimet sol transferttiń talabyndaǵy álsizdikterdi paıdalanyp, túrli qarjylyq qajettilikter úshin qarajatty ońaı tarta alady. Bolashaq urpaqtyń murasy retinde saqtalýǵa tıis Ulttyq qor bıýdjet tapshylyǵyn jabý men tıimsizdik máselelerin sheshýdiń basty kózine aınalyp otyr”, - dedi ol.
Al elimizdegi Bıýdjet kodeksi jobasy bıýdjet júıesiniń túıtkildi máselelerin sheshe almaı otyr kórinedi.
“Ókinishke qaraı, jańa Bıýdjet kodeksi jobasynda burynǵy kemshilikter saqtalyp, bıýdjet júıesiniń júıeli máseleleri sheshilmegen. Qazirgi ýaqytta osy jáne basqa da baǵyttar boıynsha usynylǵan túzetýler qyzý talqylanýda. Alaıda úkimettiń qorytyndylarynda kóptegen oryndy normalar qoldaý tappaı otyr”, - dep sózin qorytyndylady depýtat.
