Oqu-aǧartu ministrı Ashat Aimaǧambetov qazaqstandyq ūstazdardy käsıbi merekesımen qūttyqtady, dep habardaidy “Adyrna” ūlttyq portaly.
«Qymbatty ärıptester! Sızderdı käsıbi merekemen şyn jürekten qūttyqtaimyn! Ūstaz – ol tek mamandyq qana emes, sonymen bırge arnaiy aǧartuşylyq missiia. Sızder kün saiyn balalardy bılım närımen susyndatyp, olardyŋ daryndaryn aşuǧa, dūrys qūndylyqtardy boilaryna sıŋıruge kömektesesızder. Bügıngı künı elımızdegı bılım beru jüiesı – 500 myŋǧa juyq ūstazymyz eŋbek etetın ülken sala. Qasym-Jomart Kemelūly Toqaev Prezident bolyp sailanǧannan keiın bırden mūǧalımder korpusyn qoldau üşın barlyq şarany qabyldaudy tapsyrdy. Osylaişa 2019 jyly «Pedagog märtebesı turaly» zaŋ qabyldanyp, mūǧalımderdı şamadan tys esep beruden, mındetıne jatpaityn funksiialardan bosatuǧa jaǧdai jasaldy. Bılıktılık sanaty, magistratura, synyp jetekşılıgı, däpter teksergenı jäne t.b. üşın är türlı qosymşa tölemder engızılıp, olardyŋ kölemı ūlǧaityldy. Sonymen qatar Memleket basşysynyŋ şeşımderı arqasynda mūǧalımderdıŋ jalaqysy bırneşe jyldan berı jyl saiyn 25%-ǧa köterılıp keledı. Biyl 25 jyldan astam eŋbek etken barlyq ūstazǧa arnaiy marapat taǧaiyndadyq. Öitkenı öz ısıne osynşa jyl adal qyzmet etken mamandar erekşe qūrmet pen qoldauǧa laiyq. Sonymen qatar 30 jyldan astam pedagogikalyq täjıribesı bar mūǧalımderdı sanattar men ai saiynǧy qosymşa tölemder alu üşın tapsyratyn testten bosatu turaly şeşım qabyldadyq. Qyrküiek aiynan bastap el mektepterınıŋ basym köpşılıgı bes kündık oqu aptasyna auysty. Sondyqtan osy mektepterdıŋ mūǧalımderıne senbını qosymşa demalys künı retınde berudı jön kördık. Endı özderıŋızge jäne jaqyndaryŋyzǧa köbırek köŋıl böle alasyzdar. Kelesı jyly qaŋtar aiynan bastap mektep, kolledj jäne qosymşa bılım beru ūiymdaryndaǧy barlyq pedagogtıŋ jalaqysy taǧy 25%-ǧa ösedı», – dedı ministr.Onyŋ aituynşa, sondai-aq kelesı jyly el Prezidentınıŋ tapsyrmasy boiynşa balabaqşalardaǧy barlyq tärbieşınıŋ jalaqysy ösedı.
«Bız būl baǧyttaǧy jūmysty toqtatpai, būdan da qolaily jaǧdai jasaudy jalǧastyra beremız. Qadırlı ärıptester! Pandemiia kezınde de özderıŋızdı laiyqty körsete bıldıŋızder. Köptegen ata-ana sızderdıŋ jūmystaryŋyzdyŋ qanşalyqty jauapty jäne qiyn ekenın taǧy bır märte tüsındı. Al balalar mūǧalımnıŋ meiırımdı közqarasy, jyly sözı, onyŋ kömegı qanşalyqty maŋyzdy ekenın sezındı. Men qala jäne auyl mektepterıne barǧanda ärıptesterımmen äŋgımeleskendı ūnatamyn. Sızderdıŋ bılım salasyna sıŋırıp jatqan qajyrly eŋbekterıŋızdı körıp, ısterıŋızge degen süiıspenşılıkterıŋız jäne adaldyqtaryŋyz üşın alǧysymdy bıldırgım keledı. Sızderge zor densaulyq, baqyt, ısterıŋızge bereke jäne şaŋyraqtaryŋyzǧa amandyq tıleimın! Merekelerıŋızben, qūrmettı ärıptester! Ūstazdar künı qūtty bolsyn!», – dep jazdy ministr Telegram kanalynda.
Ūqsas jaŋalyqtar
