Prezıdent Qasym-Jomart Toqaev jıyn qatysýshylaryna iltıpat bildirip, bul dıalog alańy Astana halyqaralyq forýmynyń aıasynda qurylǵanyn, eń ózekti jahandyq jáne óńirlik máseleler jóninde pikir almasýǵa arnalǵanyn málimdedi, dep habarlaıdy “Adyrna” tilshisi Aqordaǵa siltep.
“Ózderińizge málim, búginde adamzat aımaqtyq qaqtyǵystar, ekonomıkalyq turaqsyzdyq, klımattyń ózgerýi, azyq-túlik jáne kóshi-qon qaýipsizdigi sekildi buryn-sońdy bolmaǵan syn-qaterlermen betpe-bet kelip otyr. Atalǵan jahandyq problemalar bárimizdi tolǵandyrady jáne oǵan tótep beretin sharalardy birlese izdegenimiz jón. Bizdiń keleshegimiz qanshalyqty kúsh-jiger biriktirip, ortaq kelisimge kele alatynymyzǵa tikeleı baılanysty. Sondyqtan Qazaqstannyń bul mańyzdy úderiske atsalysýyn zor mártebe sanaımyz”, – dedi Qasym-Jomart Toqaev.
Prezıdenttiń sózinshe, kópjaqty halyqaralyq ınstıtýttardyń bedeli álsiregen saıyn, orta derjavalardyń róli arta túsedi dep sanaıdy.
“Iri derjavalar baqtalastyqqa boı aldyryp, bir mámilege kele almaı jatqan kezde, daý-damaıdy retteýge orta derjavalar jıi dáneker bolady. Osylaısha olar jahandyq yntymaqtastyqtyń irgesi shaıqalmaýyna yqpal etedi”, – dedi Prezıdent.
Qasym-Jomart Toqaev forým qatysýshylaryna elimizdiń ósip-órkendeýi jáne qoǵamnyń demokratııalyq talpynystaryn júzege asyrý úshin Qazaqstanda júrgizilip jatqan aýqymdy saıası reformalar jóninde aıtty. Onyń pikirinshe, AES qurylysy boıynsha taıaýda ótken jalpyhalyqtyq referendým elimizdiń demokratııalyq qundylyqtarǵa beıil ekenin kórsetti.
