Ǵylym-bilim, oqý-aǵartý isi – qaı zamanda da, qaı qoǵamda da eń ózekti máselelerdiń biri. Bul jolda tókken ter – bolashaqtyń dánegine tamǵan bir-bir tamshy úles.
Isim ońsyn deseńiz,
Sol istiń mamany bolyńyz.
Dańqym shyqsyn deseńiz,
Kópshiliktiń adamy bolyńyz, - dep ál-Farabı atamyz aıtqandaı, «Adyrna» tilshisiniń kezekti suqbaty óz isiniń mamany bola bilgen bilim berý isiniń qurmetti qyzmetkeri, «Ybyraı Altynsarın» tósbelgisiniń ıegeri Nazıken Nurlanqyzymen boldy. Qyryq jylǵa taıaý ustazdyq jáne dırektordyń beıindi jumystary jónindegi orynbasary qyzmetin atqaryp kele jatqan keıipkerimiz shıelengen syrdyń shetin shyǵardy.
— Nazıken Nurlanqyzy, ótken jyly bilgen bilim berý isiniń qurmetti qyzmetkeri atansańyz, bıyl «Ybyraı Altynsarın» tósbelgisiniń ıegeri bolyp otyrsyz. Qýanyshty habardy eń birinshi kimmen bólisesiz?
— Ýaqytymyzdyń basym bóligin jumysta ótkizetin bolǵasyn bolar, ýaqyt óte kele jumys orny adamnyń ajyramas bólshegine, jyly mekenine aınalady eken. Ondaǵy ujymdastardyń da rýhanı syrlasyń, aqylshyń bolýy zańdy. Mektep, árbir ustazdyń shabyttandyrar mekeni, qym-qýyt tirligi qaınap jatqan kishigirim álemi. Sol tirliktiń pushpaǵyn kimmen birge ılep otyrsań sol ystyq bolyp ta ketedi, sondyqtan bolar bul qýanyshty jańalyqty áýeli Ahmet Baıtursynov atyndaǵy № 139 mektep-gımnazııa dırektory Erik Nurǵumarulymen, sodan soń ákimshilik múshelerimen bólistim. Keshke taman árdaıym qoldaýshym, meniń jetistigime eki ese qýanar janashyr joldasymmen bólistim, keıin qyzǵaldaǵym, gúlim qyzyma habarladym. Sóıtip ary qaraı ujym estidi quttyqtaýlar tolassyz kelip jatty.
- Jaqsy maman bolý úshin neni bilý jáne úırený qajet?
– Ár mamandyq óz aldyna bir mektep, keı mamandyq adamnyń minezin ózine ıkemdep ótkir de qatigez adam jasap jatady, al bizdiń mamandyqtyń jaıy múlde basqa. Bizdiń mamandyq áýeli adam janyn zertteýmen aınalysýdy úıretedi. Pedagogıkalyq etıketti saqtaı otyryp, oqýshyny jumys jasaýǵa, bilim ıgerýge baýlı bilý naǵyz sheberlik dep oılaımyn. Men úshin oqýshymen bolsyn, ujymmen bolsyn adamgershilik, jaýapkershilik, adam aqysy degen qaǵıdalardy oılaı otyryp qarym-qatynas ornata bilgen maman jaqsy maman.
- Sizdi osyndaı qurmet pen abyroıǵa jetkizgen ustanymyńyz jaıly aıtyp berseńiz.
— Eń alǵash eńbek jolyn bastaǵannan beri 30 jyldan astam ýaqyt ótipti. Jas maman bolyp júrgende-aq meniń oıymda ataq-dańqty ustaz bolý emes, abyroıly ustaz bolý uǵymy qurmetti ári súıkimdi edi. Abyroıdy eshqandaı qaǵaz, eshqandaı tós belgi bere almaıdy ǵoı. Búgingi kúni alyp otyrǵan qurmet tósbelgisi men kýáligi meniń 30 jyl boıǵy ustazdyq jolym men basqarý isindegi eńbegimniń aıǵaǵy ispetti, al ujymnyń qurmeti men abyroıy kóńil arqyly seziletin dúnıe. Al ustazdyń umtylýy tıis bıiktik, ustanymyn ushtap otyratyn qaıraty shákirttiń qurmetinde jatyr. Meniń ustanymym sol shákirttiń kóz aldynda abyroıly ustaz beınesinde jattalý.
- Qyzmet jolynda qajyǵan, qınalǵan, jalyqqan sátińiz boldy ma?
— Joq, bireý sener, bireý senbes, jalyǵyp ta qajyp ta kórmeppin. Qınalǵan sátter árıne boldy, qıyndyqsyz jeńis pen nátıje bolmaıdy, jumys bolǵan soń bir jeńilip, bir jeńip baryp tájirıbe jınaqtaımyz ǵoı, alaıda sol ýaqyttyń bári qaıta kelse qaıta solaı jasar edim dep oılaımyn. Óz tájirıbem men qyzmetime ketken ýaqytyma ókinip kórmeppin, mamandyq tańdaýda joly bolǵandardyń biri bolarmyn.
– Oryndalmaǵan armanyńyz bar ma?
— Kóp balaly bolý... Kóp balaly ana bolý armanym edi ǵoı, Allaǵa shúkir qyzym bar, dese de, «aǵaıyndy jigittiń kere qalys jaly bar, jalǵyz basty jigittiń shyǵar-shyqpas jany bar» deıdi ǵoı, sondyqtan ba balalarym kóp aǵaıyndy bolsa dep armandaýshy edim.
- Esesine «ájelegen» nemerelerińiz kóp bolsyn dep tileımiz, ár ustazdyń ózindik qyzyǵýshylyǵy men shyǵarmashylyq qabileti bar, sizdiń qandaı ónerińiz bar, jeztańdaı ánshi dep estip edik qanshalyqty ras?
— Endi jeztańdaı ánshi emespin, kóppen birge syzyltyp aıtatynym bar, alaıda án aıtýǵa kóp qyzyqpaımyn, biraq esti ánderdi tyńdaǵan unaıdy. Tabıǵatta, saıabaqtarda ońasha qalyp, ózimmen syrlasýdy janym sondaı súıedi. Tabıǵat mezgilderiniń aýysýy, ózindik ádemiligi, tabıǵattyń tynyshtyńy, japyraqtyń túsýi, báısheshektiń qardy jaryp shyǵýy, tańǵy qustardyń shıqyly, áınekke qatqan qyraýdyń sýreti, japyraqtarǵa bitken shyq, qardyń sytyry bári-bárin tamashalaǵan, salqyn aýany tereń-tereń tynystaǵan qatty unaıdy.
- Jas mamandarǵa berer keńesińiz?
— «Eńbek bárin jeńbek», eńbek etken adam Allaǵa da adamǵa da súıkimdi ǵoı, eńbek etip júrgen adam túptiń túbinde sút betine qaımaq bolyp shyǵady, sondyqtan eńbek etýde jarysyńdar degim keledi, sonda nátıje bolady.
- Suqbattasýǵa ýaqyt bólgenińizge kóp-kóp rahmet!
