Talǧarda kısı qolynan qūrban bolǧan Şerzat Bolattyŋ äkesı Qarjaubai Nūrymov qazaqstandyqtarǧa ündeu jasady. Būl turaly jelıde video tarady, dep habarlaidy “Adyrna” ūlttyq portaly.
«Qūrmettı qazaq elı! Sızderdıŋ aldaryŋyzda basymdy iemın. Köp-köp rahmet sızderge. Menı qoldap, balam üşın qol ūşyn berıp jatyrsyzdar. Men Qonaev qalasynyŋ ışkı ıster departamentınen keldım. Ol jerde ıs oŋ jaǧynan qaralyp jatyr. Bızge advokattar kelıp kömektesıp jatyr. Marqūm bolǧan Saltanattyŋ aǧasynyŋ da kömegı bar, ol kısıge de alǧysymdy aitamyn. Ötınışım bar, halqym. Eşqandai mitingıge şyqpaŋyzdar, qantögıs bolmasyn. Men bar jerde adamdar şoǧyrlansa, sol sättı menıŋ dūşpandarym paidalanuy mümkın. Köterılıs jasap, menı aiaqtan şalyp, bauyryma qastandyq jasauy mümkın. Sol sebeptı halqym, ötınıp sūraimyn, eşqandai köterılıstıŋ keregı joq. Men tek zaŋ aiasynda dūrys, ädıl şeşım sūraimyn. Artyq eşteŋe sūramaimyn», — dedı Qarjaubai Nūrymov.
Ol halyqtan arandatuşylyqqa boi bermeudı sūrady.
«Şyny kerek, qandai da bır aqparattar bolyp jatsa, özım ǧana bölısemın. Videojazbaǧa, audiojazba, fotolarǧa senbeŋızder. Aqyly türde advokat jaldauǧa tura keledı. Özım eşkımnen qoryqpaimyn. Özıme jauap bere alamyn. Bıraq otbasymnyŋ qauıpsızdıgı üşın alaŋdaimyn. Menı bır emes, bırneşe ret qorqytty. Alyp ketıp jatty. Telefonmen de qorqytty. «Zaŋgermız, advokatpyz, bırge oqyp edık» dep kelıp, aldap, menı dalaǧa şaqyryp alyp, qorqytqany ras. Halqymnan sūraitynym – eş qan tögılmesın. Aşyq sot boluyn talap etem. Aşyq sot bolsa, oŋ şeşım bolady. Eş arandatuǧa tüspeŋızderşı. Analar jylamasyn, balalardyŋ qany tögılmesın!. Bauyrlarym, jıgıtter, arandamaiyqşy, aldanyp qalmaiyq. Balam öldı. Endı men basqa balalardyŋ bolaşaǧy jaqsy bolsyn!», – dedı ol.
Ūqsas jaŋalyqtar
