Ūlytau oblysynyŋ äkımı referendumda dauys berdı

Ūlytau oblysynyŋ äkımı Berık Äbdıǧaliūly Jezqazǧandaǧy JBB №24 mektepte ornalasqan №213 uchaskege kelıp, öz taŋdauyn jasady. Öŋır basşysy referendumnyŋ maŋyzyna toqtaldy. «Referendum - «Estuşı memleket» tūjyrymdamasynyŋ aiasynda halyq ünıne qūlaq asu üşın ūiymdastyrylyp otyrǧan auqymdy ıs-şara. Qazaqstandaǧy barlyq tūrǧyn bügın dauys beru mümkındıgıne ie bolyp jatyr. Men de öz elımnıŋ erkın azamaty retınde uchaskege kelıp, el erteŋıne bei-jai qaramaityn jerlesterımmen bırge dauys berdım», - dedı öŋır basşysy Berık Äbdıǧaliūly öz sözınde. Jalpy Ūlytau oblysy boiynşa 132 referendum uchaskesı, onyŋ ışınde azamattardyŋ 4 uaqytşa kelu uchaskelerı jūmys ısteidı. 870 aumaqtyq jäne uchaskelık referendum komissiiasynyŋ müşesı qyzmet atqaruda. Oblys qalalaryndaǧy 21 uchaskede sailauşylar tızımınde azamattardy tekseru boiynşa onlain-servister jäne 6 uchaskede azamattardy tırkeu boiynşa servister ornatyldy. Erekşe qajettılıktı talap etetın 336 adam üşın dauys beru jaǧdailaryn qamtamasyz etu boiynşa referendum zaŋnamasy şeŋberınde jaǧdailar jasaldy. Onyŋ ışınde kreslo-arbalardy paidalanatyn 157, zaǧip jäne naşar köretınderı -108, estu qabıletı boiynşa mügedektıgı bar – 71 adam. Barlyq uchaske pandustarmen jäne tūtqalarmen, tiıstı būryştarmen jäne dauys beru üşın qajettı qūraldarmen jabdyqtalǧan. Mügedekter arbasyn paidalanatyn adamdar üşın uchaskelerde erıktılerdıŋ kömegı közdeletın bolady. Referendum künı oblystyŋ qalalarynda 6 invataksi qyzmet körsetedı.