«Kolesa.kz» qosymshasynda avtokólik bólshekterin satý týraly jalǵan habarlandyrýlar jarııalaǵan azamatsha ustaldy, dep habarlaıdy «Adyrna» ulttyq portaly Qazaqstan Respýblıkasy Bas prokýratýrasynyń baspasóz qyzmetine silteme jasap.
Ol jábirlenýshilerge avtokólikterdiń qosalqy bólshekterin ártúrli qalalarǵa jiberýge ýáde bergen. Qylmystyq nıetterin jasyrý maqsatynda olarǵa banktik derektemeler men jalǵan satyp alý sharttaryn jiberip, aqsha qarajatyn alǵan. Keıin telefon qońyraýlaryna jaýap berýdi toqtatqan. Osylaısha, sottalýshy 32 azamatty aldap, olardyń 4,8 mln teńgeden astam qarajatyn ıemdengen.
Onyń kinási tolyq dáleldenip, sot úkimimen oǵan 3 jylǵa bas bostandyǵynan aıyrý jazasy taǵaıyndaldy. Sottalǵannan jábirlenýshilerdiń paıdasyna keltirilgen materıaldyq zalal óndirildi. Úkim zańdy kúshine endi.
