Temırtau qalasynda 14 jastaǧy jasöspırım qyzdyŋ 36 jastaǧy er adammen bırge tūrǧany anyqtaldy, dep habarlaidy "Adyrna" ūlttyq portaly.
Būl oqiǧaǧa bailanysty Qaraǧandy oblysynyŋ kämeletke tolmaǧandar ısterı jönındegı mamandandyrylǧan audanaralyq soty onyŋ anasyn ata-ana qūqyǧynan aiyru turaly şeşım şyǧardy.
Sotqa Temırtau qalasynyŋ bılım bölımı jügıngen. Talap-aryzda 2010 jyly tuǧan qyzdyŋ ömır süruı men oquy üşın qajettı tūrmystyq jaǧdai jasalmaǧany, anasynyŋ tärbielık mındetterın oryndamaityny, jūmys ıstemeitını jäne ışımdıkke salynǧany körsetılgen.
Sot prosesı barysynda äieldıŋ öz qyzyn tärbieleuge nietı joq ekenı, onyŋ densaulyǧy men qauıpsızdıgıne qauıp töndırgenı anyqtaldy. Qyz 14 jasynan bastap 36 jastaǧy er adammen bırge tūrǧany resmi türde rastaldy. Anasy būǧan eşqandai şara qoldanbaǧan.
Sottyŋ mälımetınşe, äiel ışımdık ışkenı jäne balasyna tünde zaŋdy ökılsız üiden şyǧuǧa mümkındık bergenı üşın bırneşe ret äkımşılık jauapkerşılıkke tartylǧan. Sonymen qatar, ol polisiiada "jauapsyz ata-ana" retınde tırkeude tūrǧan.
2025 jyldyŋ 12 nauryzynda qyz Kämeletke tolmaǧandardy beiımdeu ortalyǧyna ornalastyryldy. Qazırgı uaqytta sol jerde tūryp jatyr.
Sot otyrysynda qamqorşylyq organy men prokuror talap-aryzdy qanaǧattandyrudy sūrady. Äiel men onyŋ qyzy anany ata-ana qūqyǧynan aiyrmaudy ötıngenımen, sot şeşımımen äiel ata-ana qūqyǧynan aiyrylyp, qyzyn asyrauǧa aliment töleu mındetteldı.
Sot şeşımı äzırge zaŋdy küşıne engen joq.
