V Dúnıejúzilik Kóshpendiler oıynynyń kókpar saıysynan keıin áleýmettik jelide qazaq halqyn balaǵattaǵan qyrǵyzstandyqtardyń beınesi tarap ketti, dep habarlaıdy "Adyrna" ulttyq portaly.
24kg arnasynyń málimetinshe, keı azamattar ustalǵan. Áleýmettik jelide er adam aýyr júk kóliginiń kabınasynan Qazaqstan týyn julyp alyp tastap jatqan vıdeo jarııalaǵan.
Vıdeonyń 21 jastaǵy avtory Qyrǵyzstan Ulttyq qaýipsizdik memlekettik komıtetine jetkizilip, áńgime júrgizdi. Er adam eki halyqtan keshirim suraǵan.
"Qyrǵyzstannyń Ulttyq qaýipsizdik jónindegi memlekettik komıteti budan keıin arandatýshylyqqa boı aldyrmaýǵa jáne sporttyq oıyndar tóńireginde qaqtyǵystardy údetpeýge, toqtatýǵa shaqyrady. Bul eki eldiń baýyrlastyq jáne dostyq qarym-qatynastaryna nuqsan keltirýi múmkin", – dep eskertti Qyrǵyzstannyń barlaý qyzmeti.
Eske salaıyq, buǵan deıin Qazaqstan quramasy kókparda Qyrǵyzstan komandasyn 5:4 esebimen jeńip, el qorjynyna altyn medal salǵan bolatyn.
