Taraz qalasynyń Dostyq úıinde «Arhyz» respýblıkalyq qoǵamdyq birlestigine qarasty «Birlik» qarashaı-balkarlardyń Jambyl fılıaly» etnomádenı birlestiginiń uıymdastyrýymen etnos kúni ótti, dep habarlaıdy adyrna.kz ulttyq portaly Jambyl oblysy ákimi apparaty «Qoǵamdyq kelisim» KMM baspasóz ortalyǵyna silteme jasap.
Tamyzdyń 22 kúni ótken is-sharany Jambyl oblysy ákimi apparaty «Qoǵamdyq kelisim» kommýnaldyq memlekettik mekemesi men «Arhyz» respýblıkalyq qoǵamdyq birlestiginiń janyndaǵy oblystyq «Birlik» qarashaı-balkarlar Jambyl fılıaly» etnomádenı birlestigi uıymdastyrdy. Jambyl oblysy ákimi apparaty «Qoǵamdyq kelisim» KMM basshysy Rano Mahsýdqyzynyń aıtýynsha, elimizde túrli etnos ókilderi tatý-tátti ǵumyr keshýde.
– Qazaqstan – barlyq etnos ókilderine keń qushaǵyn jaıa bilgen qasıetti el. Óńirlik «Birlik» qarashaı-balqarlar etnomádenı birlestigin búgingi etnos kúnderimen quttyqtaı otyryp, olardyń ótkeni men bolashaǵyna zor qurmetpen qaraıtyndyǵymyzdy bildiremiz. Qarashaı-balqarlar qaýymdastyǵyna degen yqylasymyz sheksiz. Uıymnyń talapty, ónerli jastaryna ósip-órkendeý tileımiz. Ózderińiz jaqsy bilesizder, elimiz 140 etnos pen 19 konfessııa ókilderiniń týǵan shańyraǵyna aınaldy. Azamattyq tatýlyq pen ultaralyq kelisim bizdiń basty qundylyǵymyz, – dedi Rano Mahsýdqyzy.
«Birlik» etnomádenı birlestiginiń basshysy Lelıa Ahmadqyzy jastardy úlkenge qurmet kórsetýge tárbıeleý óte mańyzdy ekenin atap ótti. Sondaı-aq ol ata-babalar rýhyna taǵzym etý, basqa da etnıkalyq erekshelikterge qatysty dástúrlerdi saqtaýǵa toqtaldy.
– Qanshama qaıǵy-qasiret pen qýǵyn-súrgindi basynan ótkergen qarashaılardyń janyna batqan qıyndyǵyn tereńinen túsinip, ystyq yqylasyn kórsetken qazaq halqy bizge óte jyly kórinedi. Bizdiń urpaqtarymyz qazaq topyraǵynda ósip-ónip, qazaq eli men jerine adal qyzmet etip keledi. Sany az bolǵanymen, qarashaı-balqar jurty mádenı ortalyqtary arqyly óziniń ulttyq bolmysy men salt-dástúrin, ult retindegi erekshelikterin qasterleı biletin halyq. Búginde osy Assambleıanyń arqasynda taǵdyry toǵysqan etnos ókilderi aýyzbirshiligin saqtap, bir shańyraq astynda tatý-tátti ǵumyr keship jatyr. Aldaǵy ýaqytta da birligimizdi kórsetip, tolaıym tirlikter atqara bereıik, – dedi ol.
Jıyn sońynda Qazaqstan halqy Assambleıasynyń is-sharalaryna aıanbaı óz úlesterin qosyp júrgen «Birlik» qarashaı-balqarlar birlestiginiń Analar keńesiniń músheleri men shyǵarmashylyq jastaryna alǵys hattar men syılyqtar tartý etildi.
"Adyrna"
ulttyq portaly
