Ūlttyq ūlannyŋ Taraz qalasyndaǧy 5513 äskeri bölımınıŋ atys alaŋynda Qüreŋ beretke ümıtkerlerdıŋ bılıktılık synaǧy öttı. Oǧan elımızdıŋ är aimaǧynan arnaiy maqsattaǧy bölımşelerdıŋ äskeri qyzmetşılerı qatysty.
Mūndai synaq türı jyl saiyn elımızdıŋ är aimaǧynda ötkızıledı. Negızgı basty maqsaty - ekstermizm jäne laŋkestıktıŋ jolyn kesu, qoǧam men azamattardyŋ qauıpsızdıgın qamtamasyz etu mındetın oryndaityn «B» arnaiy jasaǧy müşelerınıŋ daiyndyǧyn şyŋdau. Jalpy jasaqtar qūramynda barlyq talapqa sai keletın sardarlar men kelısım-şart boiynşa äskeri qyzmetşıler qyzmet etude.
Biylǧy osy dästürlı dodaǧa 300-ge juyq niet bıldıruşınıŋ arasynan ırıktelgen 80-nen astam ümıtker qorytyndy synaqqa qatysty. Olar alǧaşqy kezeŋde teoriialyq testıleuden ötıp, dene şynyqtyru, biıktıktegı daiyndyq, arnaiy qūrylǧylarmen tömen tüsu, bailanys jäne medisinalyq daiyndyq boiynşa synaq tapsyrdy. Osy aralyqta tömen körsetkış körsetken qatysuşylar ekınşı kezeŋge öte almady. Joly bolyp şeşuşı kezeŋge nebärı 44 ümıtker jıberıldı.
Şeşuşı kezeŋnıŋ bırınşı künı synaqqa qatysuşylar taŋǧy saǧat 5:00-de dabyl arqyly köterıldı. Sol küiı 5 şaqyrymǧa jügıru boiynşa synaq tapsyrdy. Odan soŋ ūzaq ta kürdelı joryqqa attandy. Jolda olar qarsylastyŋ şabuylyn toitaru, jaralanǧan qarulasynyŋ jarasyn tanyp, qauıpsız aimaqqa süirep ötu, ört şyqqan aimaqtan tynys aluǧa arnalǧan bas kiımmen jügıru sekıldı tapsyrmalardy oryndady. Jolai äbden şarşaǧan jauyngerler bauyrymen jorǧalap, jatqan küiı tasalanuǧa arnalǧan or qazdy jäne etıgımen su keştı. Taŋ atpastan aiaqqa tūrǧan ümıtkerler jele jortqan küiı keşke deiın damyl tappady.
Synaq kezınde jauyngerlerge fizikalyq jäne psihologiialyq soqqy jasaldy. Olar soǧan qaramastan kezıkken qiyndyqtardy jeŋıp, märege jetu üşın erık-jıgerın aianǧan joq.
Osynau bır aptadan berı arnaiy jasaq jauyngerlerı oryndap jatqan tapsyrmalar legı aiaqtaldy. Synaqtyŋ qorytyndy künı olar 10 şaqyrym jügırıp, oq därı salynǧan qobdişalardy süireuden normativ tapsyrdy. Selkıldek köpır üstınen ötıp, temır baǧannan tömenge syrǧanady.
Qiǧaş qoiylǧan aǧaştardyŋ bırınen eŋkeiıp, bırın attap, şynjyr bailanǧan döŋgelekter qabyrǧasyna örmelep şyqty. Aspaly temırlerdı de artta qaldyrdy. Su basseiınıne sekırıp, biık tas qabyrǧany bırlese eŋserdı.
Osy uaqyt aralyǧynda jan-jaqtaryn ört torlap, aldarynan pulemet saqyldap tūrdy. Al özge de kedergılerdıŋ maŋyna taiaǧan kezde jarylys bolyp jatty. Olar būrqyrai atylǧan pulemet oǧynynyŋ astynan jorǧalap baryp, qauıpsız nüktede asynyp jürgen qaruynan oq atty. Ümıtkerlerge bır oq jäne bır ǧana mümkındık berıldı. Qūm tiıp, su şaşylǧan qarudan oq atylmai qalsa jauynger synaqty osy jerde aiaqtar edı. Baby men baǧy qatar şauyp, auyr synnan sürınbei ötkender aqtyq synaq – qoian-qoltyq töbeleske şyqty. Üş raundtan tūratyn jekpe-jektıŋ soŋǧy bölımınde ringtegı jıgıtter tyŋ tūrǧan küreŋ beret iegerlerımen küş synasty. Abyroi bolǧanda, būǧan deiın sapta bolǧan 15 ümıtkerdıŋ bärı de 9 minut boiy soqqylarǧa tötep berdı. Älı ketıp, küşı sarqylǧandardyŋ özı temırdei tözımdılık tanytty. Osylaişa, olardyŋ bärı de küreŋ beret iegerlerı atandy.
Synaqtan sürınbei ötkenderge saltanatty jaǧdaida qasterlı küreŋ beret tabystaldy. Is-şaraǧa Jambyl oblysynyŋ äkımı Erbol Qaraşökeev arnaiy keldı. Qūrmettı qonaqtardyŋ arasynda Ūlttyq ūlan äskerımen tyǧyz bailanystaǧy özge de äskeri küş qūrylymdardyŋ basşylary boldy.
- «Küreŋ beret» bas kiımın kiiu ärı «Bürkıt» keude belgısın taǧu qūqyǧyna ie bolu janqiiarlyq erlık pen batyldyqty talap etedı. Dese de mūndai synaqqa qūryştai şynyqqan äskerler ǧana baratyny anyq. Küreŋ berettı kiiu märtebesıne arnalǧan bılıktılık synaǧynan ötu – jauyngerlık ruhtyŋ belgısı. Būl şara jastardy Otanǧa degen adaldyq pen riiasyz mahabbatqa tärbieleuge baǧyttalady, - dedı Jambyl oblysynyŋ äkımı.
Oblys basşysynyŋ sözınen keiın synaqtan sürınbei ötken jauyngerlerge Ūlttyq ūlan Bas qolbasşysynyŋ orynbasary general-maior Bauyrjan Äbjanov «Küreŋ beret» bas kiımın tabystady. Sondai-aq, ol dıttegen maqsatyna qol jetkızgen jauyngerlerdı Işkı ıster ministrı polisiia general-leitenanty Sadenov Erjan Saparbekūly men Işkı ıster ministrınıŋ orynbasary - Ūlttyq ūlannyŋ Bas qolbasşysy general-maior Baltabekov Aŋsaǧan Skenderūlynyŋ atynan qūttyqtady.
- Būl synaqtar qūqyqtyq tärtıp äskerınıŋ dästürlı sabaqtastyǧyn jalǧai otyryp, «Bürkıt» arnaiy jasaq jauyngerlerınıŋ käsıbi bılıktılıgın arttyru jäne şeberlıkterın şyŋdau maqsatynda ūiymdastyrylǧan. «Bürkıt» arnaiy jasaǧynyŋ jauyngerlerı özderıne jüktelgen tapsyrmalardy sättı oryndap keledı. Sondai-aq memlekettıŋ jäne azamattardyŋ konstitusiialyq qūqyǧyn qorǧauda öz mındetterın abyroimen atqaruda. Biylǧy jeltoqsan aiynda atalǧan arnaiy jasaqtyŋ qūrylǧanyna 25 jyl tolady. Osy uaqyt aralyǧynda IIM jäne Ūlttyq ūlan basşylary arnaiy jasaq jauyngerlerınıŋ daiyndyǧyna qoldau körsetıp, nazarda ūstap keldı. Qazırgı uaqytta arnaiy jasaq bölımşelerın qamtamasyz etu deŋgeiı artpasa kemıgen emes. Sondyqtan da mūnda qyzmet atqarǧysy keletın äskerilerge qoiylatyn talap qataŋ. Būl sözımızge «Küreŋ beret» bauyrlastyǧyna qosylǧan jauyngerlerdıŋ deŋgeiı dälel bola alady. Bügın küreŋ beret kigen äskeri qyzmetşılerdıŋ qatary 15 adamǧa tolǧyp otyr, - dedı general-maior Bauyrjan Äbjanov.
Osylaişa, synaqty sättı aiaqtaǧan jauyngerlerdıŋ tökken terı, etken eŋbegı aqtaldy. Olar būl kündı eşqaşan ūmytpaq emes.
- Küreŋ beret alu — menıŋ armanym edı. Osy synaqqa tyŋǧylyqty daiyndaldym. Maǧan senım artqan adamdarǧa aitar alǧysym şeksız. 65 şaqyrymdy eŋserdık. Būl tyŋǧylyqty daiyndyqtyŋ ǧana emes, namys pen jıgerdıŋ de arqasynda dep oilaimyn. Jasym 41-ge taiap qaldy. Bügınge deiın osy qūrmetke ie boludy maqsat etıp edım. Byltyr däl osy synaqtyŋ jartysyna kelgende densaulyǧym syr berıp, qalys qalyp edım. Şükır, jaqyndarymnyŋ arqasynda eŋse tıktep, bügıngı deŋgeige jettık. Būl men üşın Olimpiada altynymen parapar, – dedı bügın ǧana küreŋ beret iegerı atanǧan «JAK» esımdı jauynger.
Aita keteiık, äskeri qyzmetşıler arasyndaǧy qaisarlyq pen öjettılıktı, şydamdylyq pen tözımdılıktı syŋǧa salar aituly şarany tamaşalauǧa Türkiia, Resei, Özbekstan jäne Qyrǧyz Respublikalarynyŋ arnaiy jasaq ökılderı de kelıp, özderınıŋ joǧary baǧalaryn berdı.
