Qazaqstan Respýblıkasy Prezıdentiniń keńesshisi – Prezıdenttiń Baspasóz hatshysy Berik Ýálı jelidegi paraqshasynda sý qoımalarynyń jaıyn qozǵady, dep habarlaıdy "Adyrna" ulttyq portaly.
"Osydan týra 5 jyl buryn, 19 qyrkúıek kúni Prezıdent Qasym-Jomart Toqaev Úkimet pen Shyǵys Qazaqstan oblysy ákimdigine tvıtter arqyly Buqtyrma sý qoımasyna kópir salý úshin qarjy bólýdi tapsyrǵan bolatyn. Qazirgi ýaqytta kópir qurylysy aıaqtalýǵa jaqyn. Eki birdeı oblystyń, 6 aýdannyń arasyn jalǵaıtyn strategııalyq nysan jyl sońyna deıin paıdalanýǵa beriledi dep josparlanyp otyr.
Bul kópir jergilikti turǵyndar úshin kópten kútken qýanysh, súıinshileıtin úlken jańalyq bolaıyn dep tur. Óıtkeni Shyǵys Qazaqstan men Abaı oblystarynyń Marqakól, Kúrshim, Katonqaraǵaı jáne Kókpekti aýdandarynyń turǵyndary 50 jyl boıy jol azabyn tartty. Jazǵy ýaqytta parom arqyly, qys mezgilinde muz ústimen júrdi. Talaı adamnyń sýǵa ketkeni de jasyryn emes. Sondyqtan bul kópirdi salýdyń mańyzy joǵary edi.
Bul – elimizdegi eń uzyn kópir bolmaq. Eki jolaqty avtomobıl kópiriniń jalpy uzyndyǵy 1316 metrdi quraıdy. Táýligine 80 myń kólikke deıin ótkize alady. Sonymen qatar joba aıasynda uzyndyǵy 18,6 shaqyrym bolatyn kópirge qosylatyn jańa avtojol qurylysy qarastyrylǵan.
Esterińizge sala keteıik, 2019 jyly 18 qyrkúıekte «Egemen Qazaqstan» gazetinde «Elý jyl burynǵy eski parom eldi qashanǵy áýrege túsiredi?» degen taqyryppen jýrnalıst Azamat Qasymnyń maqalasy jarııalanǵan bolatyn. Osy maqala kópirdiń salynýyna arqaý bolǵan edi", delingen jazbada.
