Memleket basshysy Q. K Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýynda: «Sýdy barynsha únemdeý jumysyn uıymdastyrý kerek. Bul – eń aldymen, aýyl sharýashylyǵyna qatysty másele, ıaǵnı sý únemdeý tehnologııasyn, ásirese, aýyl sharýashylyǵynda keńinen qoldaný qajet.»,- dep atap ótken bolatyn.
Memleket basshysynyń tapsyrmasyn iske asyrý jáne aýdanymyzda aýyl sharýashylyǵy salasyn damytý maqsatynda aýqymdy jumystar iske asyrylyp keledi.
Búginde, Alakól aýdanynyń negizgi prıorıtetteriniń biri- qant qyzylshasy ónim kólemin molaıtý, jańa tehnologııalardy qoldaný jumystary basty nazarda.
Osy oraıda, «Bolat Group LTD» JShS-giniń qant qyzylshasy alqabynda sharýa ıesi Bolat Seırbaevtyń uıymdastyrýymen qant qyzylshasy ónimin molaıtýdyń tıimdi joly, zamanaýı tehnıkalardy qoldaný, tuqym túrleri jáne tamshylatyp sýarý tehnologııasyn paıdalanýdyń mańyzdylyǵy jóninde qala, aýyldyq okrýgtegi aýyl sharýashylyǵy salasynyń mamandary, sharýa qojalyqtarymen aýdandyq semınar ótti.
Jıynda aýdan ákimi A. Abdınov sharýa qojalyqtaryna bir kisideı jumyla at salysyp, aýdanymyzdyń negizgi basymdyqtarynyń biri – qant qyzylshasyn kóbeıtip, aýyl sharýashylyǵy salasyn damytý qajettigin atap ótti. Arnaıy shaqyrylǵan «Avgýst» AQ men «Explanta» JShS-gi zamanaýı tehnologııalar men durys ári sapaly tuqym túrlerin paıdalanyp ónim kólemin molaıtý jóninde keńesterimen bólisti.
«Bolat Group LTD» JShS-gi bıylǵy jyly 3 sm tereńdikke 275 gektar alqapqa tamshylatyp sýarý tehnologııasyn paıdalanyp tátti túbir ónimin ekti. Tamshylatyp sýarý ádisi arqyly 6-8 ese sý men tyńaıtqysh, jumys kúshi únemdeledi. Sharýa ıesi sý kólemin únemdeý, jer qunarlyǵyn saqtaý, ónim kólemin molaıtý úshin alǵash ret oblysymyzda tamshylatyp sýarý ádisin qoldandy. Jıym terim ýaqytynda 275 gektar jerden mol ónim alsa, kelesi jyly 1000 gektar jerge qant qyzylshasyn sebýdi kózdep otyr.
Sharýa basshysy B. Seırbaev aýdanymyzdaǵy sharýa qojalyq ıelerine tamshylatyp sýarý tehnologııasynyń mańyzdylyǵyn atap, jumys barysyn, qoldanǵan tuqym túrlerin tanystyryp ótti. «Jıym terim ýaqytyna da az qaldy. Endigi basty maqsat ónim kólemi oń nátıje berse, aýdanymyzǵa úlken qant qyzylshasy zaýytyn salsaq.»-deıdi «Bolat Group LTD» JShS-giniń basshysy.
