Búgin Memleket basshysynyń bastamasymen qolǵa alynǵan «Taza Qazaqstan» respýblıkalyq ekologııalyq baǵdarlamasy aıasyndaǵy is-sharalar Shymkent qalasynda jalǵasyn tapty.
Ekologııalyq is-sharalarǵa qalanyń shetki aımaqtaryndaǵy eldi mekenderdiń turǵyndary, Shymkent qalalyq Qoǵamdyq keńesiniń músheleri, aýdan ardagerleri, «Jasyl el» eńbek jasaqtary, erikti jastar qatysty.
Búgingi is-sharaǵa qatysýshylar Memleket basshysynyń ekologııalyq mádenıetti qalyptastyrý jónindegi bastamasyna jan-jaqty qoldaý kórsetip, «Taza kóshe – Taza aýla», «Bulaq kórseń kózin ash», «Taza jaǵalaý» uranymen qala turǵyndary men qonaqtaryna tazalyq mádenıetin qalyptastyrýdy da nasıhattady.
«Tazalyq kisiniń ishki mádenıetiniń, adamgershiliginiń kórinisi deýge bolady. Biz ózimizdiń, óz úıimizdiń ǵana emes, turyp jatqan jerimizdiń, qalamyzdyń, týǵan jerimizdiń taza bolýyna da basa mán berýge daǵdylanýymyz kerek. Memleket basshysynyń bastamasymen qolǵa alynyp otyrǵan «Taza Qazaqstan» baǵdarlamasyna jastardyń belsendi túrde qatysyp jatqanyn kórip qýanyp otyrmyn», - deıdi Shymkent qalasy Turan aýdanyndaǵy ardagerler keńesiniń tóraǵasy Ádilbek Satybaldy.
Jalpy búginde Shymkent qalasynyń turǵyndary «Taza Qazaqstan» memlekettik baǵdarlamasynyń oń nátıje kórsetip jatqanyn, turǵyndar arasynda tazalyq mádenıetiniń qalyptasyp kele jatqanyn, bul bastamanyń kópshilik ystyq yqylaspen qabyldap jatyrǵany baıqaýǵa bolady.
Osy oraıda «Jasyl el» shtabynyń Qarataý aýdany boıynsha úılestirýshisi Nurlyıslam Qýanysh – «Qorshaǵan ortany, tabıǵatty qorǵaý – barshaǵa ortaq mindet. Sondyqtan barsha qala turǵyndary men jastardy osy ıgilikti sharaǵa úles qosýǵa shaqyratynyn, sondaı-aq kúndelikti turmystyq qaldyqtardan shyqqan qoqystardyń qalanyń ekologııasyna tıgizer zalalynyń orasan ekenin aıtyp, tazalyqty saqtaýǵa shaqyrdy.
Jalpy qalada ótken tazalyq is-sharasyna 23 tehnıka, 1200-den astam turǵyndar qatysyp, 35 shaqyrymnan astam jol boıynda tazalyq jumystary men 2 shaǵyn aýdandaǵy kóp qabatty turǵyn úı aýlalary, 2 gúlzar men 1 eldi meken aýmaǵy tazalanyp, 76 tonna qoqys shyǵaryldy.
