3 qyrküiekte Almatydaǧy Chaplin Mega Alma-Ata kinoteatrynda IX Baiqonyr kinofestivalınıŋ saltanatty aşylu räsımı öttı. Üş jüzden astam qonaq jinalǧan şara körermenderge halyqaralyq jüldelerge ie bolyp ülgergen rejisser Kenjebek Şaiqaqovtyŋ «Aiqai» filmınıŋ körsetılımımen bastaldy.
Jyl saiyn kino salasynyŋ üzdıkterın jinap, kino älemıne endı aiaq basqan jas kinematograftarǧa bastau bolatyn Baiqonyr kinofestivalı osymen toǧyzynşy jyl qatarynan ūiymdastyrylyp otyr.
Aşylu saltanatynda alǧaş söz alǧan Baiqonyr Film Festival prezidentı Anuar Kenjebaev biylǧy festivaldıŋ bırneşe erekşelıgın atap öttı. Sonyŋ bırı - būǧan deiın Baiqonyr aiasynda ūiymdastyrylyp kelgen animasiialyq filmder baiqauy - Almaty Animation Festival biyl bölek festival retınde şıldede öttı. Būl da festival aiasyn qalai keŋeitıp jatqanyn körsetedı.
«Kinofestival tek jas talanttardy körsetumen şektelmeidı. Bız olardy qoldap qana qoimai, sonymen qatar kino salasyn damytyp jatyrmyz dep oilaimyn. Mūnyŋ aiqyn dälelı - festival aiasynda Kinotanuşylar men kinosynşylardyŋ III halyqaralyq forumynyŋ ötkızıluı», - dedı Kenjebaev festivalmen qatar ötıp jatqan forum turaly.
Festival dästürlı türde TMD-ǧa qatysuşy memleketterdıŋ Memleketaralyq gumanitarlyq yntymaqtastyǧy qorynyŋ qoldauymen ötedı. Sondai-aq, Anuar Kenjebaev öz sözınde Chaplin Mega Alma-Ata kinoteatryna erekşe alǧysyn bıldırıp, kinoteatrdyŋ arqasynda biyl būrynǧydan 160 adamǧa köbırek qonaq şaqyru mümkındıgı tuǧanyn atap öttı.
IX Baiqonyr kinofestivalınıŋ taǧy bır erekşelıgın ataǧan baǧdarlamalyq direktor Erjan Jūmabekov biyl alǧaş ret debiuttık tolyqmetrajdy filmder baiqauy ötetının aitty.
Biyl 20 elden kelıp tüsken 670 ötınımnıŋ ışınen festivaldıŋ baiqau baǧdarlamasyna qatysatyn 34 film ırıktelıp alyndy. Baiqauǧa Qazaqstan, Gruziia, Äzırbaijan, Armeniia, Özbekstan, Täjıkstan, Qyrǧyzstan jäne Resei elderınıŋ ökılderı qatysyp jatyr.
«Biyl bız Baiqonyr kinofestivalı baǧdarlamasyn maqtanyşpen ūsynamyz. Būrynǧy festivalderde tolyqmetrajdy filmderdı baǧdarlamadan tys körsetetınbız, al biyl baiqau aiasynda körsetıp jatyrmyz. Qysqa metrlı filmderden ösken jas rejisserlerdıŋ alǧaşqy filmderın körsetetın bıregei platforma festival bolady dep oilaimyz», - dedı Jūmabekov.
Baiqauǧa tüsken filmder arasynan üzdıkterın anyqtaityn qazylar alqasy da saltanatty şarada nazardan tys qalmady. Baiqonyr kinofestivalınıŋ halyqaralyq baiqauyn Qazaqstandyq qazylar alqasy baǧalaidy, al Ūlttyq baiqaudyŋ jeŋımpazdaryn halyqaralyq qazylar alqasy anyqtaidy.
«Menıŋ oiymşa, qazır Baiqonyr kinofestivalder arasynda monopolist rölge ie bolǧan siiaqty, sebebı būl - debiutanttardyŋ, studentter men jaŋa esımder aşylyp, mansaby bastalatyn jalǧyz jūmys ıstep tūrǧan festival. Maǧan rejisser jäne kino salasyndaǧy adam retınde Baiqonyr filmderın köru ärqaşan qyzyqty. Būl - impuls, tynys jäne älemdık arenaǧa tramplin», - dedı tanymal rejisser Ädılhan Erjanov. Ol biyl Halyqaralyq baiqauda baǧa beretın qazylar alqasynyŋ töraǧasy.
Keiın şaraǧa jinalǧan qonaqtar asyǧa kütken Semei poligonymen taǧdyrlas äke men bala ömırın baiandaityn Kenjebek Şaiqaqovtyŋ «Aiqai» filmınıŋ körsetılımın tamaşalady. Film alǧaş ret Qazaqstanda körsetılıp otyr, būǧan deiın filmnıŋ premerasy Pusan halyqaralyq kinofestivalınde ötken.
IX Baiqonyr kinofestivalı 3-8 qyrküiek aralyǧynda ötedı, baiqauǧa tüsken barlyq film MEGA Alma-Ata sauda ortalyǧyndaǧy Chaplin Cinemas kinoteatrynda tegın körsetıledı. Tek tolyqmetrajdy filmder aqyly negızde körsetıledı, oǧan bilettı Kino.kz saitynan, ne qosymşasynan satyp aluǧa bolady.
Sonymen qatar, III Halyqaralyq kinotanuşylar men kinosynşylar forumy aiasynda türlı avtorlyq därıster, paneldık sessiialar men şeberlık sabaqtary AlmaU universitetınde ötedı. Kıru tegın.
