Aqtóbede ýnıversıt basshysynyń áıeli talapkerlerden aqsha alǵan, dep habarlaıdy “Adyrna” ulttyq portaly Dıapazonǵa siltep.
Ýnıversıtet basshysynyń áıeli talapkerlerden oqý aqysy degen jeleýmen aqsha alǵan. Al oqýǵa túspek bolǵandar áıelge 100 myńnan 1,5 mln teńgege deıin bergenderin aıtady.
Basylym dereginshe, Aqtóbe qalasynda halyqaralyq kólik-gýmanıtarlyq ýnıversıtetiniń ókildigi bar. Gúlmıra T. stýdent bolamyn degen talarkerlerden qomaqty somma alyp, aqshany óz qalaýynsha jumsaǵan degen derek tarady.
47 jastaǵy aıyptalýshynyń qylmystyq isinde 25 epızod bar ekeni anyqtalyp otyr. Al kúıeýi áıeliniń stýdentterden aqsha alǵanynan beıhabar ekenin aıtqan. Sot otyrysynda ol jarynyń qaryzy týraly ýnıversıtettiń bas keńsesinen qońyraý shalǵannan keıin bilgenin atap ótken.
Al ózin oqý ornynyń ádiskeri retinde tanystyryp, oqý aqysyn óziniń jeke bank shotyna aýdarýǵa nemese qolma-qol berýge kóndirgen áıel óz kinásin moıyndamady.
Sotta áıel adam ýnıversıtettiń Aqtóbedegi fılıalyn kúıeýi basqaratynyn, onyń barlyq aýdarymdardan habardar bolǵanyn, al zardap shekkenderden túsken aqsha otbasynyń qajettiligine jumsalǵanyn aıtqan. Bul qarjyny kúıeýi men onyń ata-anasy ózdiginshe jaratqanyn alǵa tartqan.
Keıinirek aıyptalýshy sottan kishkentaı balalary bar ekenin eskerip, bas bostandyǵynan aıyrmaıtyn jaza taǵaıyndaýdy surady.
Isti bolǵan áıel barlyq qaryzdy qaıtaryp berýge mindettelip, 3 jylǵa bas bostandyǵynan aıyryldy.
