Atyraýda blogerler kelemejdep, vıdeosyn jelige júktegen Memlekettik saraptama ortalyǵynyń kúzetshisi qan qysymy kóterilip, kóz jumdy. Bul týraly advokat Aınur Balakeshova áleýmettik jelidegi paraqshasynda bólisti, dep habarlaıdy “Adyrna” ulttyq portaly.
Aqparatqa sáıkes, memlekettik mekemeniń 56 jastaǵy kúzetshisi Hákim Imanııazovqa ózderin bloger degen kelýshiler aýyr sóz aıtqan. Saldarynan kúzetshiniń densaýlyǵy kúrt nasharlap, jedel járdem shaqyrylǵan. Al birneshe aptadan keıin ol qaıtys bolǵan.
Advokat málimetinshe, bloger memlekettik mekemege kirmek bolǵan, biraq kúzetshi týrnıketten ótýge ruqsat bermegen. Olar ǵımaratta órt qaýipsizdigi salasyndaǵy birqatar zańbuzýshylyqty kórgenin aıtyp, mekemeniń syrtynda elimizdiń týy ilinbegenin alǵa tartqan.
"Myna jerdi qarańyz, zań buzylyp tur. Tý joq, dym joq. Sálemetsiz be, ishte kim bar? Bizge basshy kerek. Órt sóndiretin qurylǵylar da istemeıdi. Ashyq qoı, kire berýge bolady. Siz kimsiz? Qolym-aı. 102 shaqyryńdar. Kimsiz ózi? Maǵan jala japqanyńyz úshin aryz jazamyn. Qolyńdy tart!" - deıdi vıdeodaǵy áıel.
Vıdeoda kúzetshi áıeldi mekemeden shyǵarmaq bolady. Alaıda áıelge er adam jaqtasyp, kúzetshige "Kimsiń ózi? Bomjsyń ba? Erkek emessiń!" deıdi.
Aýrýhanaǵa túsken er adam birneshe kúnnen keıin jan tapsyrǵan. Kúzetshi Hákim Imanııazov 56 jasta edi. Artynda eki ul, bir qyzy qaldy.
Ratriot tilshileri kúzetshiniń jesirimen telefon arqyly sóılesken. Márııam qyzmette júrgen kúıeýine til tıgizgen eki adamdy jaýapqa tartpaq.
Polıeıler Memlekettik saraptama ortalyǵy blogerlerge qatysty aryz jazǵanyn rastady.
