Makınsk qalasynda jáne Bulandy aýdanynyń basqa da eldi mekenderinde sý qubyry jelilerin qaıta qurý boıynsha birneshe ınfraqurylymdyq jobalar júzege asyrylýda.
Memleket basshysy Qasym-Jomart Toqaevtyń tapsyrmasy boıynsha júrgizilip jatqan sý sharýashylyǵy ınfraqurylymyn keshendi jańǵyrtý sheńberinde halyqty taza aýyz sýmen qamtamasyz etý boıynsha jumystar qolǵa alynǵan.
"Makınsk qalasynda sý qubyry jelilerin qaıta jańartý osy jyldyń jazynan bastaldy. Búgingi tańda qalanyń 8 kóshesinde qubyr tartý jumystary aıaqtaldy, 169 qudyq montajdaldy, 12 shaqyrymnan astam abonenttik qubyr salyndy", - dep atap ótti Bulandy aýdanynyń qurylys bólimi basshysynyń mindetin atqarýshy Elka Jarıa.
Aıta ketsek, sý qubyry jelilerin qaıta jańartý jumystary aýdannyń eldi mekenderinde de júrgizilýde. Tórt aýylda ınfraqurylymdyq jobalar aǵymdaǵy jyly aıaqtalady, bul 2000-nan astam adamdy sapaly aýyz sýmen qamtamasyz etýge múmkindik beredi.
