Sport jýrnalısi Aınat Qabıdýllaev Parıj Olımpıadasynda óner kórsetken qazaqstandyq boksshylar jaıly oıyn aıtty, dep habarlaıdy “Adyrna” tilshisi.
Altynsyz qalǵan otandyq bylǵary qolǵap sheberlerin jurtshylyq áli de qyzý talqylaýda. Sport jýrnalısiniń aıtýynsha elimizde eń jaqsy jaǵdaı boksshylarǵa ǵana jasalǵan. Alaıda olar bul jaǵdaıdy aqtaı almady deıdi:
“Bizdiń burynǵy boksshylarymyz lapyldap janyp turatyn. Qazir boksshylarymyz Olımpıadaǵa atústi qaraıtyn bolǵan. Olımpıadaǵa ketpeı turyp únemi elde toı-tomalaqtan shyqpaıdy. Sonyń saldaryn kórip otyrmyz. Odan bólek, boksshylarǵa negizi barlyq jaǵdaı jasalǵan. Oqý-jattyǵý jıyndary joǵary deńgeıde ótedi. Vıtamınderi de, tamaqtary da ýaqytyly. Psıhologtarmen de jumys jasady. Osyndaı kórsetilgen qoldaýdan keıin olar kem degende bir altynmen kelýge mindetti edi” dedi ol.
Sondaı-aq, jýrnalıst bizdiń boksshylardyń “toq” ekenin aıtty:
“Sportshy Olımpıadaǵa ash barýy kerek. Bizdiń boksshylardyń jaǵdaıy jaqsy. Bári toq. Qarapaıym lıenzııa alǵan kúnnen-aq aıaqtaryn jerge tıgizbeı kútip alyp, qomaqty syıaqy alyp jatty. Ony bergen de durys qoı, biraq Olımpıadadan keıin berilse basqasha bolar ma edi” dedi Aınat Qabıdýllaev.
Odan bólek fınaldyq básekede súringen Nurbek Oralbaıdyń jeńýine bolatynyn qosty ol. Jýrnalıstiń aıtýynsha, bapkerler durys taktıka usynbaǵan:
“Alǵashqy aınalymnan ushyp ketip jatqan boksshylarymyzdy kórip, kúmis alsaq ta, altynmen para-par bolatynyn uqtyq. Nurbek Oralbaı fınalǵa shyqqanda qýandyq. Dese de, ýkraındyq Hıjnıakty da jeńýge bolatyn edi. Onyń stıli- tek tómpeshtep urý. Bapkerler Nurbekke osy stılge yńǵaılap taktıka usynǵanda altynnan alqa taǵynar ma edik. Buǵan bapkerler keıin ózderi qosatynyn qosar” dedi ol.
Sonymen qatar, tóreshilerge shaǵymdanǵan jurtshylyqty synǵa aldy. Qazaqtar jeńilisti qabyldaı almaıdy dep sókti ol:
“”Jeńilgenniń sózi qurysyn demekshi” tóreshi kináli dep jeńil qutylýǵa bolmaıdy. Boksshylarymyzdyń bári taza jeńildi. Muhammedsabyr Bazarbaıulynyń ǵana jekpe-jegin 50/50 dep baǵalaýǵa bolady. Biraq tóreshi grýzın boksshysynyń qolyn kóterdi. Tý kóterip shyqqan Aslanbek Shymbergenovtyń alǵashqy aınalymnan jeńilýi - uıat nárse. El erikkennen eshkimge tý ustatpaıdy. Senim bolǵan edi. Odan keıin jeke bapkerlerdiń de kinási bar. 16 boksshy iriktelse sonyń 16-syna da jeke taktıkalyq daıyndyq kerek edi. Bizdikiler bir kún qalǵanda qarsylasyn bilip, soǵan ǵana daıyndyq júrgizdi. Kóp jaǵdaıda san soǵyp qaldyq” dedi jýrnalıst.
