Májilis depýtaty Dáýlet Muqaev sportqa bólingen qarjynyń qaıda ketip jatqany jaıly surady. Bul týraly ol májilistegi dóńgelek ústel barysynda aıtty, dep habarlaıdy “Adyrna” ulttyq portaly.
«Buqaralyq sportqa qansha qarjy bólinetinin mınıstrlikten de surattym jáne ár oblysqa hat jiberip, málimet jınaǵan edim. Sizderdiń esepterińizdegi bólingen qarjy 289 mlrd (teńge) solaı keldi de, biraq oblystardyń bergen esepteri túsiniksiz. Eshkim eshteńe túsinbeıdi. «Siz qaı sportty surap jatyrsyz? Qaı aqshany?» dep ózderi menen suraıdy. 20 oblys, sonyń ishinde Astana, Almaty jáne Shymkent qalalaryn qosqan kezde, Soltústik Qazaqstan men Pavlodar oblystary ǵana aqshanyń qaıda ketkenin, qaıda bólingenin, qaıda sportqa bólingenin, bárin túsinip otyrǵan sııaqty. Olar barlyǵyn naqty qaıda ketkenin bólip, jaryp, málimet berdi», - dedi depýtat.
Depýtattyń aıtýynsha, qalǵan aımaqtar bólingen qarjy týraly jalpy aqparat ǵana bergen. Mysaly, Astana boıynsha 20 mlrd (teńge), Qostanaı oblysyna 13 mlrd (teńge).
«Jalpy bólingen aqsha týraly mınıstrlik túgili, jergilikti basshylardyń ózderi túsinbeı jatyr», - deıdi Muqaev.
