Jaz maýsymy demalysymen qyzyq. Elimizde ári demalyp, ári sulýlyǵyna tamsanyp, demalatyn kórikti jerler jeterlik. Sonyń ishinde shıpaly sýymen talaıdyń súıikti demalys mekenine aınalǵan Alakóldiń jóni bólek. Jýyrda kól jaǵasyndaǵy Aqshı aýylynda ótken «Alakol Fest – 2024» mýzykalyq festıvali aspandy áýeletken áýenimen demalýshylardyń kóńilin kókke kóterip, otandyq týrızmniń mártebesin arttyrdy.
Alakól – Qazaqstandaǵy sırek kólderdiń biri, jaǵalaýy malta taspen kómkerilgen, sýynyń quramy emdik mıneraldarǵa toly erekshe sý aıdyny. Elimizde týrızm qaryshtap damyǵaly beri munda keletin qonaqtar sany eselep arta túsýde. Alakóldiń dańqy tek Qazaqstanda ǵana emes, jaqyn shetelderde de tanymal, jyl saıyn arnaıy kelip demalatyn halyqtyń qarasy óte mol. Qazirgi ýaqytta kól boıynda demalýǵa qolaıly sanalýan demalys bazalary jáne pansıonattar kelýshilerge qyzmet kórsetedi. Bıylǵy maýsym Alakólge qyzyǵýshylar sany tipti artqanyn kórsetti, jaǵajaıda ıne shansharlyq bos oryn joq.
Ashyq aspan astynda ótken «Alakol Fest – 2024» mýzykalyq festıvalin jan-jaqtan jınalǵan bes myńnan astam adam tamashalady, olar tipti aýa-raıynyń qolaısyzdyǵyna qaramastan kól aınalasyn kóterińki kóńil-kúıge bóledi.
Aıdyndy Alakól jaǵasyndaǵy festıval sahnasynda tanymal estrada artısteri Ádil Jalmaǵambetov (Adil), Eńlik Qurarbek (Yenlik), Lýıza Karınbaeva (Luina), Aıgerim Raqysheva (Ayree) tyńdarmannyń eń súıikti ánderin oryndady. Keshtiń mýzykalyq tizginin ustaǵan júrgizýshiler Erkebulan Myrzabek pen Marat Oralǵazın jarasymdy ázil-qaljyńymen demalýshylardyń kóńilinen shyqty.
Festıval otandyq týrızmniń kókeıkesti máseleleri sheshimin taba bastaǵanyn kórsetti, kól aýmaǵyna jetý jeńildegen, aptasyna 28 ret Astana, Almaty jáne Taldyqorǵan qalalarynan 3 áýe reısi, Almaty, Astana qalalarynan, Shyǵys Qazaqstan oblysynan jáne Abaı oblysynan 12 temirjol reısi, Almaty men Taldyqorǵannan 50 oryndyq avtobýstar kúnde júredi. Sondyqtan bolar, jyldaǵyǵa qaraǵanda týrıster qarasy kúrt kóbeıgen, derekter boıynsha, munda jylyna 1,5 mln adam demalady.
Sýy shıpa, kórki ásem Alakól, elimizdiń maqtanyshyna aınalǵan áıgili nysanda ótken mýzykalyq festıval ishki týrızmge nazar aýdaryp, odan saıyn jaqsara túsýine septigin tıgizeri sózsiz.
D.Iskakov
