Úkimet sý tasqynynan zardap shekken bilim berý mekemelerin qalpyna keltirýge qarjy bóldi, dep habarlaıdy "Adyrna" ulttyq portaly.
Kóktemgi sý tasqynynan zardap shekken bilim berý mekemeleri men uıymdaryn qalpyna keltirý jumystary jalǵasyp jatyr. Sol sebepti Úkimettiń tótenshe rezervinen qosymsha qarajat bólindi. Tıisti qaýlyǵa Premer-Mınıstr Oljas Bektenov qol qoıdy.
«Bólingen qarajattyń jalpy somasy – 7,5 mlrd teńge. Bul qarajat búlingen nysandardy qalpyna keltirýge, sondaı-aq qıraǵan nysandardyń ornyna jańa bilim berý mekemelerin salýǵa jumsalady. Qostanaı oblysynda Jangeldın aýdanyndaǵy Aısa Nurmanov atyndaǵy mektep ǵımaratyn jóndeý josparlanǵan. Aqmola oblysynda Atbasar qalasynda №1 mektep, Atbasar aýdany Sergeevka aýylynda «Esil» saýyqtyrý kesheni, sondaı-aq Derjavınsk qalasynda Abaı atyndaǵy mektep salynady. Aqtóbe oblysynda Kótibar batyr atyndaǵy mektep jáne Muǵaljar aýdanyndaǵy «Balaýsa» balabaqshasy, Oıyl aýdanyndaǵy «Balbóbek» mektep-baqshasy men balabaqshasy, Ekpetal mektebi qamtylady» dep málimdedi úkimet.
Bólingen qarajat jergilikti atqarýshy organdarǵa búlingen ǵımarattardy aldaǵy oqý jyly bastalǵanǵa deıin ýaqytyly qalpyna keltirýge múmkindik beredi dep josparlanǵan.
