Aqmola oblysynda AN-2 ushaǵy apatqa ushyrady, dep habarlaıdy “Adyrna” ulttyq portaly Tótenshe jaǵdaılar mınıstrliginiń baspasóz qyzmetine siltep.
TJM málimetinshe zardap shekkender joq.
«Derjavınsk qalasynan 10 shaqyrym jerde AN-2 ushaǵy kóterilý kezinde órtendi», - delingen habarlamada.
Ushqysh janyp jatqan ushaqtan óz betinshe evakýaııalanǵan. Qazir órt sóndirildi.
Órttiń shyǵý sebebi anyqtalyp jatyr.
Aıta keteıik, 3 mamyr kúni Qostanaı oblysynda sý basqan aımaqta qalǵan naýqasty qutqarýǵa barǵan sanıtarlyq avıaııa ushaǵy apatqa ushyraǵan edi.
Mundaı apat AN-2 ushaǵynda jıi bolady. Aviation Safety Network jobasynyń onlaın bazasynda ushaq 618 ret áýe apatyna ushyrap, saldarynan 776 adam qaza tapqan.
2021 jyldyń 4 shildesinde saǵat 07.00-de Qyzylorda qalasynyń Qaraýyltóbe aýylynan 12 shaqyrym jerde kúrish egistigin óńdeý kezinde AN-2 ushaǵy qulady. Ol ushyp shyqqannan keıin birneshe saǵattan soń tehnıkalyq aqaý saldarynan qonýǵa májbúr bolyp, eginniń ústine qulaǵan.
2022 jyldyń 11 aqpanynda AN-2 ushaǵy Kamchatkadaǵy Korıakı aýylynyń mańynda qulaǵan. Qaza tapqandar joq.
2024 jyldyń 19 shildesinde An-2 ushaǵy Armenııanyń Kotaık oblysyndaǵy Egvard qalasynyń mańynda apatqa ushyrady, eki adam qaza tapty.
2024 jyly 3 mamyrda Qazaqstannyń Qostanaı oblysynda týra osy markaly ushaq apatqa ushyraǵan. 21 shildede AN-2 taǵy da apatqa ushyrady.
